“Tez yordam mashinasi 5 yilda ikki baravarga ko‘paydi, bitta chaqiruv dorisi 640 so‘mdan 7,5 ming so‘mga oshdi”. “Daryo” tibbiyotdagi o‘zgarishlarni Namangan viloyati misolida o‘rgandi

Prezidentning 2022-yil iyundagi qarori bilan Respublika tez tibbiy yordam markazi va uning hududiy filiallari qayta tashkil etildi. “Daryo” muxbiri Azizbek Abduvaliyev mazkur sohadagi o‘zgarishlarni Namangan viloyati misolida o‘rgandi.

“Uzoqroq joyga borsak, qaytishga benzin topolmagan kunlarimiz bo‘lgan”

Respublika tez tibbiy yordam markazi Namangan viloyat filiali direktori Adhamjon Irisboyevning bildirishicha, ushbu qarordan so‘ng viloyatda faoliyat ko‘rsatib kelayotgan barcha tez tibbiy yordam bo‘limi, shoxobcha va punktlar hamda avtoxo‘jaliklar yagona vertikal boshqaruv tizimiga aylantirilgan. Bu esa tizimda ish yuritishni qulay va samarali bo‘lishi uchun xizmat qilmoqda.

Filialda bugungi kunda 6,5 mingga yaqin xodim faoliyat ko‘rsatmoqda. Ulardan 1,2 ming nafardan ko‘prog‘ini shifokorlar, 3,5 mingdan ortig‘ini esa o‘rta tibbiyot xodimlari tashkil etadi. Haydovchilarning o‘zi 1,3 ming nafardan oshiq.

Bilasiz, bizning tizimda avtomobillarning soni va sifati hal qiluvchi ahamiyatga ega. Kuni-kecha Jizzaxda ishlab chiqarilgan 10 ta Volkswagen Caddy avtomobilini oldik. Fevral oyida yana 6 ta shunday mashina berishmoqchi. Shu tariqa eskirgan 70 ta mashinamizni bosqichma-bosqich yangi, zamonaviylariga almashtiramiz. Bu jarayon 2025 yilgacha yakuniga yetishi rejalashtirilgan. Hozir avtoxo‘jaligimizda jami 229 ta avtomobilimiz bor. Ishonish qiyin, lekin 2017 yilda Namangan shahri tez tibbiy yordam bo‘limida bor-yo‘g‘i 29 ta brigada va shuncha mashina bo‘lgan. Hozir ularning soni 52 taga yetdi. Bundan besh yil avval bitta chaqiruv uchun dori-darmonga ajratilgan pul 640 so‘m bo‘lgan, bugungi kunda 7,5 ming so‘m. Oldinlari brigadalarimiz uzoqroq joyga borsa, qaytishga benzin topolmagan kunlari bo‘lgan. Xudoga shukr, bugun dori-darmonda ham, yoqilg‘ida ham muammo qolmadi, barchasi hal etib berilgan. Transport vositalarimiz GPS tizimiga ulangan, yaqin orada radioloqa va planshetlar bilan ham taʼminlanadi. Tez yordamdagi bu o‘zgarishlarni oldin faqat orzu qilardik”, — deydi Adhamjon Irisboyev.

“Har bir brigada ish boshlashidan avval bemorlarga uzoq umr va mustahkam sog‘liq tilab, so‘ng yo‘lga chiqadi”

“Daryo” ijodiy guruhi tez tibbiy yordam brigadasi bilan birgalikda tungi chaqiruv manziliga bordi. Maktabning ikkinchi sinfida tahsil olayotgan o‘quvchi qizni kuchli og‘riq bezovta qilayotgan edi. Vrach-reanimatolog Shukurjon Erkinov bemorni ko‘zdan kechirgach, uni zudlik bilan shoshilinch tez yordam ilmiy markaziga olib ketishga qaror qildi.

Mashinaga uning onasi ham chiqdi. U va hamshira Munavvar Do‘smatova to shifoxonaga yetib borguncha og‘riq va qo‘rquvdan bezovtalanayotgan qizni tinchlantirib ketdi.

Bunday holatlarda psixolog ham bo‘lishga to‘g‘ri keladi. Chunki bemorga nafaqat dori-darmon, balki shirin so‘z ham ozuqa bo‘ladi. Ayniqsa, bolalar uchun, — deydi Munavvar Do‘smatova.

Bemor sanoqli daqiqalarda kasalxonaga yetkazildi va shifokorlarga topshirildi. Shundan so‘ng tez yordam brigadasi yengil tin olib, keyingi manzil sari yo‘l oldi.

Vrach-reanimatolog Shukurjon Erkinov 35 yillik tajribaga ega, tez yordam tizimida ishlayotganiga esa 15 yildan oshgan.

O‘zining aytishicha, maxsus reanimobilda bemorni eson-omon shifoxonagacha yetkazib borsa, xuddi farzand ko‘rgandek suyunadi. Chunki bemorlikning og‘ir mashaqqatlari o‘zining ham boshidan o‘tgan.

Bundan ikki yil avval o‘zim ham Сovid-19 bilan qattiq og‘rib qoldim. Jar yoqasidan qaytdim desam ham bo‘ladi. Shunda tiriklikning nechog‘li ulug‘ neʼmat ekanligini o‘zim ham yana bir bor his etdim. Ishoning, bizdagi har bir brigada ish boshlashidan avval navbatchiligi davomidagi bemorlarga uzoq umr va mustahkam sog‘liq tilab, so‘ng yo‘lga chiqadi, — deydi shifokor.

“Telefon orqali tibbiy maslahat bergan paytlarimiz ham ko‘p bo‘ladi”

Respublika tez tibbiy yordam markazi Namangan viloyat filialiga 2022-yil davomida 1,2 milliondan oshiq chaqiruv kelib tushgan. Ularni filial Call-markazi xodimlari qabul qilib olgan. Viloyatda 240 nafar xodim navbatchilik kunlari sutka davomida o‘rtacha 150-180 ta chaqiruv qabul qiladi.

Chaqiruvlar qish va jazirama yoz mavsumida ko‘proq bo‘ladi. Eng tig‘iz payt esa kechki mahalga to‘g‘ri keladi. Biz bilan bog‘lanayotganlarning aksariyati surunkali kasalligi bor bemorlar. Ularning aksariyatiga telefon orqali ham kerakli tavsiyalarni beramiz, chunki oramizda malakali tibbiyot xodimlari ko‘p, — deydi markaz dispetcheri Mohigul Asqarova.

Mohigul Asqarovaning aytishicha, markaz faoliyatida yolg‘on yoki natijasiz chaqiruvlar ham kam emas. O‘tgan yili ularning soni qariyb 10 mingtani tashkil etgan.

Shuningdek, qo‘ng‘iroq qilish davomida dashnom va haqoratlarga ham duch kelamiz. Lekin bemor va uning yaqinlarini asabiy holatini tushunib, sabr qilamiz va tinchlantiramiz. Faoliyatimizdagi bunday salbiy jihatlar boshqa bemorlarning brigada borib kelganidan so‘ng yoki bayram kunlaridagi minnatdorlik so‘zlari bilan yoddan ko‘tarilib ketadi, — deydi Mohigul.

Maʼlumot uchun, Respublika tez tibbiy yordam markazi Namangan viloyat filiali yaqin kunlarda yana bir alohida binoga ega bo‘lishi ko‘zda tutilmoqda. Ushbu bino rekonstruksiyasi uchun mablag‘ joriy yil birinchi choragi davomida moliyalashtirilishi rejalashtirilgan.