Isroil sobiq bosh vaziri Naftali Bennet urush boshida Vladimir Putin unga Ukraina prezidenti Vladimir Zelenskiyni o‘ldirmaslikka va’da bergani haqida aytib berdi. Bu haqda The Jerusalem Post xabar bermoqda.
2021—2022-yillarda Isroil hukumatini boshqargan Bennet “12-kanal”ga bergan intervyusida 2022-yil mart oyida Moskvaga kelganida Rossiya prezidenti bilan bu masalani muhokama qilganini aytdi. Sobiq bosh vazirning so‘zlariga ko‘ra, u Putinga Ukraina prezidentining o‘ldirilishi borasida to‘g‘ridan to‘g‘ri savol bergan, Putin esa “Men Zelenskiyni o‘ldirmoqchi emasman”, deb javob qaytargan. So‘ng Bennet Rossiya prezidentidan bunday qilmaslikka so‘z berishni so‘ragan, Putin Zelenskiyni o‘ldirish niyati yo‘qligini takrorlagan.
Uchrashuvdan so‘ng Bennet o‘sha paytda maxfiy bunkerda yashiringan Zelenskiyga qo‘ng‘iroq qilib, unga xavf yo‘qligini aytgan. Bir necha soatdan so‘ng Ukraina prezidenti o‘z kabinetida o‘tirgani aks etgan videoni e’lon qildi, deydi Bennet.
Isroil sobiq bosh vaziri o‘shanda uning barcha harakatlari AQSH, Germaniya va Fransiya bilan kelishilganini qo‘shimcha qildi.
2022-yil mart oyida Britaniyaning The Times gazetasi Vladimir Zelenskiy bir hafta ichida kamida uchta suiqasddan omon qolgani haqida xabar bergandi. Nashr maʼlumotlariga koʻra, Ukraina prezidentini oʻldirish topshirigʻi bilan mamlakatga ikki guruh – “Vagner” yollanma askarlari va chechen maxsus boʻlinmalari kelgan, biroq ularning rejalari Rossiya Federal xavsizlik xizmatining urushga qarshi zobitlari tomonidan barbod etilgan. 2023-yil yanvar oyida Rossiyaning Ukrainaga bosqini boshlanganidan beri Zelenskiy 12 tadan ortiq suiqasddan omon qolgani, ulardan ba’zilarining oldini olishga Amerika Markaziy razvedka boshqarmasi yordam bergani xabar qilingandi.
Izoh (0)