Pokiston sobiq prezidenti Parvez Musharraf 79 yoshida Dubaydagi kasalxonada vafot etdi, deb xabar bermoqda The Guardian.
So‘nggi yillarda Birlashgan Arab Amirliklarida quvg‘inlikda yashagan Musharraf organizmda oqsil almashinuvining buzilishi bilan bog‘liq kam uchraydigan amiloidoz kasalligidan davolanib kelayotgandi.
Pokiston Mudofaa vazirligi sobiq prezidentning vafoti munosabati bilan hamdardlik bildirdi.
Parvez Musharraf Pokistonda 1999-yilda harbiy to‘ntarish natijasida hokimiyat tepasiga kelgandi. U 2001—2008-yillarda mamlakat prezidenti lavozimida ishlagan.
2013-yilda Pokiston hukumati tashabbusi bilan Musharrafga nisbatan jinoiy ish ochildi. U 2007-yilda Oliy sud Musharrafning yangi muddatga qayta saylanishi qonuniy yoki yo‘qligini tekshirish to‘g‘risida qaror chiqargan paytda mamlakatda favqulodda holat joriy etib, konstitutsiyani to‘xtatib turgani uchun davlatga xiyonatda ayblangan. 2019-yil oxirida Musharraf sirtdan o‘lim jazosiga hukm etilgan, biroq bir oy o‘tib hukm bekor qilingan.
2016-yildan beri Parvez Musharraf Dubayda istiqomat qilib kelayotgandi. Kasallik fonida u vataniga qaytishni istashi haqida aytgan.
Izoh (0)