O‘zbekistonda sarguzasht turizmiga oid davlat standarti qabul qilindi. Bu haqda Madaniyat va turizm vazirligi xabar berdi.
Ma’lum qilinishicha, “Turizm xizmatlarini sertifikatlash markazi” DUK qoshidagi STQ 4 “Turizm va madaniy meros” standartlashtirish boʻyicha texnik qoʻmita tomonidan “Sarguzasht turizmi. Xavfsizlikni boshqarish tizimlari. Talablar” davlat standarti ishlab chiqildi.
Mazkur davlat standarti Oʻzbekiston texnik jihatdan tartibga solish agentligining 2023-yil 18-yanvardagi buyrugʻi bilan qabul qilindi.
Ushbu standart sarguzasht turizmi faoliyati provayderlari uchun xavfsizlikni boshqarish tizimining talablarini belgilaydi. Provayder ushbu standartdan quyidagilar uchun foydalanishi mumkin:
- xavfsizlik samaradorligini oshirish;
- ishtirokchilar va xodimlar xavfsizligiga nisbatan kutilmalarni oqlash;
- xavfsiz amaliyotni koʻrsatish;
- amaldagi qonunchilik talablariga muvofiqligini qoʻllab-quvvatlash.
Ushbu standart har xil geografik, madaniy va ijtimoiy muhitda ishlaydigan barcha turdagi va oʻlchamdagi provayderlar tomonidan qoʻllanishi mumkin.
Standart 2023-yil 18-apreldan amalga joriy etiladi.
Izoh (0)