Buyuk Britaniya Ichki ishlar vazirligi “Vagner” xususiy harbiy kompaniyasini terrorchi tashkilot deb e’lon qilish rejalari ustida ishlamoqda, deb xabar berdi The Telegraph.
Nashrning yozishicha, Britaniya rasmiylarining tegishli qarori “Vagner” guruhini ISHID va “Al-Qoida” kabi guruhlar bilan bir qatorga qo‘yadi, bu esa, o‘z navbatida, guruhning Buyuk Britaniya moliyaviy institutlari orqali o‘tadigan aktiv yoki daromad oqimiga ta’sir qiladi.
Bundan tashqari, agar Britaniya hukumati “Vagner”ni terrorchi tashkilot deb tan olsa, Buyuk Britaniyada nafaqat ushbu tuzilmaga a’zo bo‘lish yoki uning tadbirlarida qatnashish, balki vagnerchilarni har qanday qo‘llab-quvvatlash va hatto logotipni ommaviy namoyish qilish ham jinoiy javobgarlikka tortiladi.
Hozirda, deb yozadi gazeta, bu masala muhokamaning dastlabki bosqichida, biroq, manbalarning aytishicha, yakuniy qaror nisbatan tezroq qabul qilinishi mumkin. 6-fevral kuni Britaniya parlamenti Jamoatlar palatasining Tashqi aloqalar qo‘mitasida “Vagner” faoliyatiga oid muhokama bo‘lib o‘tishi kutilmoqda.
Telegraph nashri jurnalistlari Buyuk Britaniya rasmiylari yakuniy qaror qabul qilinmaguncha vaziyatga izoh bermaydi, deb o‘ylamoqda.
Yanvar oyi oxirida AQSH Moliya vazirligi “Vagner”ni transmilliy jinoiy tashkilot deb e’lon qildi, shuningdek, guruh bilan bog‘liq bo‘lgan tuzilmalar va kompaniyalarga qarshi qo‘shimcha sanksiyalar joriy qildi.
“Vagner” jangarilari Ukrainadagi urushda faol ishtirok etmoqda, ular rasmiy ravishda Rossiya Mudofaa vazirligiga hisobot bermaydi. Bundan tashqari, guruh Afrikaning turli mamlakatlarida faoliyat yuritadi. Guruh jangchilari bor joylarning barchasidan “Vagner”chilar tomonidan sodir etilgan ko‘plab jinoyatlar haqida xabarlar keladi.
Izoh (0)