Iqtisodiyot va moliya vazirligi aholini uy-joy bilan ta’minlash bo‘yicha ajratilgan ipoteka kreditlari va ularga to‘langan subsidiyalar doirasida 2022-yilda amalga oshirilgan ishlar to‘g‘risida ma'lumot berdi.
Yangi tartib doirasida ajratilgan kreditlar
Qayd etilishicha, yangi tartib bilan 2020—2022-yillarda 67 947 nafar fuqaroga 15,1 trillion so‘m miqdorida ipoteka kreditlari ajratilgan.
2020-yilda jami 1,7 trillion so‘mlik ipoteka kreditlari ajratilgan bo‘lsa, 2021-yilda kreditlar miqdori 3,1 trillion so‘mga oshib 4,8 trillion so‘mni tashkil etgan.
2022-yilda 37 418 nafar fuqaroga 8,5 trillion so‘m miqdorida ipoteka kreditlari ajratilgan. Ushbu ko‘rsatkichlar 2021-yilning mos davriga nisbatan soni bo‘yicha 1,7 barobar, (14 816 fuqaro), miqdori bo‘yicha 1,8 barobarga (3,7 trillion so‘m) ortgan.
Ipoteka kreditlari bo‘yicha to‘langan subsidiyalar
Uy-joy sharoitlarini yaxshilashga muhtoj shaxslarni qo‘llab-quvvatlash maqsadida ipoteka krediti bo‘yicha dastlabki badal va foizlarning bir qismini qoplash uchun davlat budjeti mablag‘lari hisobidan subsidiyalar to‘lash mexanizmi joriy etilgan.
2020—2022-yillar davomida ipoteka krediti bo‘yicha fuqarolarga 1,2 trillion so‘m subsidiyalar ajratilgan.
2020-yilda jami 65,8 milliard so‘m subsidiyalar to‘langan bo‘lsa, 2021-yilda 238,9 milliard so‘mga oshib, 304,7 milliard so‘mni tashkil etgan.
2022-yilda fuqarolarga 854,4 milliard so‘m subsidiyalar to‘lab berilgan bo‘lib, shundan 17 293 nafar fuqaroga boshlang‘ich badal to‘lovini bir qismini qoplashga 514,5 milliard so‘m, foiz to‘lovining bir qismini qoplashga 28 090 nafar fuqaroga 339,9 milliard so‘m subsidiyalar to‘langan. Ushbu ko‘rsatkichlar 2021-yilning mos davriga nisbatan miqdori bo‘yicha 2,8 barobarga (549,8 milliard so‘m ) ortgan.
Izoh (0)