Fransiyada poyezdda ketayotgan yigit o‘zini portlatib yuborish bilan tahdid qildi

Fransiyaning Lotaringiya shahrida Kolmar—Parij yo‘nalishidagi tezyurar poyezdga hujum qilish bilan tahdid qilgan 24 yoshli yigit hibsga olindi. Bu haqda Le Figaro xabar berdi.

Ma’lum qilinishicha, vaziyat nazorat qilingan va yigt hibsga olingan. Ayrim manbalar poyezddagi yo‘lovchilardan biri o‘zini portlatib yuborishi bilan qo‘rqitib, atrofidagilardan “Xudoga ishonasizmi?” deb so‘raganini yozmoqda. Yigit xizmat vazifasini bajarmagan va poyezdda ketayotgan polisiyachi tomonidan qo‘lga olgan.

France Info nashri yangi Travel and Protect dasturi huquq-tartibot xodimlariga xizmat qurollari bilan harakatlanish imkonini bergani, bu yigitni zararsizlantirishda yordam berganini ma’lum qildi. Shundan so‘ng Fransiya ichki ishlar vaziri Jerald Darmanin Twitter’da u amalga oshirgan Travel and Protect dasturi o‘z samarasini amalda ko‘rsatayotganini yozdi.

"Men amalga oshirgan Travel Protect tizimi har kuni transportda xavfsiz harakatlanish uchun samarali bo‘lmoqda! Bugun ertalab bundan foydalangan polisiya xodimi poyezdda tahdid qilgan yigitni hibsga oldi”, — dedi u.

Yigitni polisiya bo‘limiga olib borish uchun poyezd Luvini bekatida to‘xtagan. Shu sabab poyezd harakatlanishi bir yarim soatga kechiktirilgan. Temir yo‘l kompaniyasi yigit haqiqatan ham o‘zini portlatib yubormoqchi bo‘lgani yoki bu quruq tahdid ekani haqida ma’lumotga ega emasligini aytmoqda.