AQSH va boshqa G‘arb davlatlari rasmiylari Ukrainada halok bo‘lgan va yaralangan rus askarlari soni 200 mingga yaqinlashganini taxmin qilmoqda. Bu haqda The New York Times xabar berdi.
Gazetaning yozishicha, Rossiya bir necha oylardan beri shiddatli janglar davom etayotgan Baxmutda eng katta yo‘qotishlarga duch kelgan. Moskva Donbassning sharqiy qismini egallashda kalit hudud deb biladigan ushbu shaharni olish uchun rus harbiylari yomon tayyorgarlikdan o‘tgan askarlar va sobiq mahbuslardan foydalanmoqda. NYT ma’lumotlariga ko‘ra, Rossiya harbiy muassasasi mahbuslarni xarajat materiallari deb hisoblaydi.
AQSH Mudofaa vazirligi yuqori martabali vakili Kolin Kalning so‘zlariga ko‘ra, rossiyalik harbiylarning bunday taktikasi Rossiyada o‘q-dorilar, jumladan, artilleriya snaryadlari tugab qolgani bilan bog‘liq. Ruslar bu kamomadni “mahbuslarni Baxmut va Soledar kabi joylarga jo‘natish” orqali to‘ldirmoqda, dedi vazirlik vakili.
Shu bilan birga, nashrning taʼkidlashicha, odamlarini yoʻqotish Vladimir Putinning harbiy maqsadlarini toʻxtatishi qiyin, chunki Moskva “katta gʻalabaga muhtoj”.
“Aslida, Rossiyaning yo‘qotishlari qanchalik katta bo‘lishi ahamiyatsiz, chunki ularning umumiy inson resurslari Ukrainanikidan ancha katta. Rossiyada askarning hayoti hech narsaga arzimaydi. Boshqa tomondan, o‘lgan askar qanday o‘lim topganidan qat’i nazar, qahramon hisoblanadi. Barcha halok bo‘lgan askarlarning o‘rni to‘ldirilishi mumkin, qurbonlar soni esa urush haqidagi jamoatchilik fikrini o‘zgartirmaydi”, — deya gazeta Estoniya Mudofaa vazirligi kansleri Kusti Salma so‘zlarini keltirdi.
Ukrainaning yo‘qotishlari haqida NYT AQSH Qurolli kuchlari shtab boshliqlari birlashgan qo‘mitasi rahbari Mark Millining bahosiga tayanmoqda. 2022-yilning noyabrida u mojaroning har ikki tomoni 100 mingdan ortiq odamidan ayrilganini aytgandi. Shu bilan birga, nashrning ta’kidlashicha, Baxmut uchun janglarda Ukrainaning yo‘qotishlari Rossiyaning yo‘qotishlari bilan teng bo‘lishi mumkin.
Rossiya Mudofaa vazirligi oxirgi marta 2022-yil sentabrda o‘z yo‘qotishlari haqida xabar bergandi. O‘sha paytda, Rossiya mudofaa vaziri Sergey Shoygu urushda 5 937 nafar rus qo‘shini halok bo‘lganini aytgan.
“Mediazona”, BBC rus xizmati va ko‘ngillilarning aniqlashicha, Rossiyada 17-yanvargacha, ochiq manbalarga ko‘ra, Ukrainaga bosqinda qatnashgan 11 662 nafar rossiyalik askarning o‘limi tasdiqlangan.
Ukraina Qurolli kuchlari Bosh shtabi 23-yanvar kungi hisobotida Rossiya bosqinida 121 mingdan ortiq rus askari halok bo‘lganini ma’lum qildi. 2022-yil dekabrda Ukraina prezidenti ofisi urush boshlanganidan beri 10 mingdan 13 minggacha ukrainalik harbiy halok bo‘lganini xabar qilgandi.
Izoh (0)