“Real”ning ikki yetakchisi jarohat oldi

Madridning “Real” klubi futbolchilari Eder Militao va Karim Benzema La Liga qoldirilgan turi doirasida “Valensiya”ga qarshi kechgan bahsda (2:0) jarohat oldi.

Braziliyalik himoyachi 34-daqiqada raqib futbolchisi bilan to‘qnashuvdan keyin sonidan jarohat oldi va maydonni tark etdi. 60-daqiqada esa Karim Benzema oyog‘idagi og‘riq bois zaxiraga olindi.

Klubdagilar Militaoning jarohatidan xavotirda, u juda jiddiy ko‘rinmoqda. Benzemada esa aksincha, shikastlanish jiddiy emas, deya xabar qilmoqda La Saeta Rubia jurnalist Arancha Rodrigesga tayanib.

Har ikki futbolchi 3-fevral kuni tibbiy ko‘rikdan o‘tadi, shundan keyin jarohatlarning qay darajada jiddiy ekani ma’lum bo‘ladi.

Ayni vaqtda “Real”da himoyachilar David Alaba, Ferlan Mendi va Lukas Vaskes jarohat sabab lazaretda bo‘lib turibdi.