“Oʻzbekneftgaz”: “Maroqand neft bazasi”da talon-torojlikka yoʻl qoʻygan xodimlarga oid toʻplangan hujjatlar huquqni muhofaza qiluvchi idoralarga taqdim etildi
“Oʻzbekneftgaz” AJ Boshqaruvi raisi Mehriddin Abdullayevning topshirigʻiga koʻra, korrupsiyaga qarshi kurashish, moliyaviy va komplayens nazorati yoʻnalishidagi xato-kamchiliklarni aniqlash va ularni kelgusida yoʻl qoʻyilishining oldini olishga qaratilgan profilaktik tadbirlar davom etmoqda.
Navbatdagi oʻrganishlar “Maroqand neft bazasi” masʼuliyati cheklangan jamiyatida oʻtkazildi.
Doimiy tarzda olib borilayotgan oʻrganishlarga qaramasdan, Jamiyat sobiq rahbarlari va masʼul xodimlari tomonidan neft mahsulotlarining saqlanishi, isteʼmolchilarga yetkazib berilishi, debitor va kreditor qarzdorliklar bilan koʻplab nooʻrin xarajatlarga yoʻl qoʻyish holatlari aniqlanmoqda. Xususan, ular tomonidan amaldagi qonunchilikka rioya qilmaslik natijasida 48 834,1 mln.soʻmlik moliyaviy xato va kamchiliklarga yoʻl qoʻyilganligi fosh etildi.
“Maroqand neft bazasi” MCHJning sobiq rahbariyati va mutasaddi xodimlari oʻz xizmat mavqeidan foydalanib oʻzlariga tegishli korxonalar va fermer xoʻjaliklariga jami 17 818,3 mln soʻmlik neft mahsulotlari toʻlovsiz yetkazib, oʻzlashtirishgan.
Neft baza hisobchilari tomonidan jami 1 829,0 mln soʻm jamiyat hisob raqamiga kelib tushmagan boʻlsada, sunʼiy ravishda isteʼmolchilarning interaktiv kartalariga kiritilib, neft mahsulotlari oʻzlashtirilgan.
Ish xaqi va unga tenglashtirilgan toʻlovlar bilan bogʻliq jami 1 066,8 mln soʻmlik ortiqcha toʻlovlar va moliyaviy xato-kamchiliklar aniqlangan.
Jamiyatning markaziy neft mahsulotlari ombori va tasarrufidagi FYOTSHlarda jami 564,5 mln soʻmlik neft mahsulotlari va 89,0 mln soʻmlik asosiy vositalar va inventarlar kamomadlari aniqlandi.
Jamiyatning markaziy neft mahsulotlari omborida va “Ziyovuddin” filialida saqlanib kelinayotgan 6 365,6 tonna neft mahsulotlari “GOST” standart talablariga mos kelmasligi, yani sifatsizligi maʼlum boʻldi.
Jamiyatga tegishli temir yoʻl sexi, qozonxona va avtoxoʻjaliklari tomonidan 520,0 mln soʻmlik neft mahsulotlari asossiz hisobdan chiqarilgan.
Jamiyatning 2022-yil 1-dekabr holatiga muddati oʻtgan debitor qarzdorligi 50 555,1 mln soʻmni tashkil qilgan. Ushbu qarzdorlik boʻyicha majburiy undiruv choralari koʻrilmaganli oqibatida 14 173,0 mln soʻmi umidsiz qarzga aylangan.
Jamiyat sobiq bosh hisobchisi oʻz vazifasiga sovuqqonlik bilan qaraganligi natijasida 10 405,7 mln soʻmlik qoʻshilgan qiymat soligʻi ortiqcha toʻlangan.
Jamiyat tasarrufidagi AYOQSHda 29,0 mln soʻm chakana savdo pul tushumlari oʻz vaqtida Jamiyatning tegishli hisob raqamlariga kirim qilinmagan.
Shartnomalarning xarid qonunchiligiga toʻgʻri kelishi tanlov asosida oʻrganilganda qiymati 268,7 mln soʻmlik shartnomalar davlat haridlari qonunchiligiga zid ravishda toʻgʻridan-toʻgʻri tuzilganligi aniqlandi.
Taʼkidlash joizki, oʻrganish jarayonida jami 4 522,9 mln soʻmlik pul mablagʻlari Jamiyat hisob raqamiga undirilishi taʼminlandi.
Aniqlangan holatlarga huquqiy baho berish va kamomadlarga yoʻl qoʻygan xodimlarga nisbatan qonuniy chora koʻrish maqsadida, toʻplangan hujjatlar huquqni muhofaza qiluvchi idoralarga taqdim etildi.
“Oʻzbekneftgaz” AJ tomonidan korrupsiyani oldini olishga doir chora-tadbirlar, korrupsiyaga va boshqa xato-kamchiliklarga oid huquqbuzarliklarni aniqlash, ularga chek qoʻyish va xodimlarni ushbu yoʻnalishda huquqiy ongini oshirish ishlari davom etmoqda.
“Oʻzbekneftgaz” AJ Matbuot xizmati
