“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 17-soni mavzusi “Amerikada Oʻzbekiston ovozi” bo‘lib, dastur mehmoni sifatida “Amerika ovozi” jurnalisti Navbahor Imomova taklif etildi.
— Men har doim Oʻzbekistonni dunyoga tanishtirganimda, efirlarimizda, umuman, xalqaro hamjamiyat bilan muloqotimizda jurnalist sifatida bir narsaga urgʻu beraman: Oʻzbekistonda erkinlik, demokratiya bilan bogʻliq tarix, tajriba deyarli yoʻq. Shu bois hamma narsa ibtidoiy tuyulishi mumkin. Oʻzbekistonga kelganimda hali ham, har yoqda sezaman, erkinlik deganda odamlar, asosan, oʻz erkinligini, demokratiya deganda gapirish, fikr-qarashlarini namoyon etish huquqini tushunadi. Lekin boshqalarnikiga nisbatan toqat, tolerantlik pastroq. Hamma narsa bu oʻzi nima, degan savol atrofida aylanyapti. Oʻzbekistonda ham boshqa jamiyatlar singari murakkab global tendensiyalar, global fenomenlar, butun insoniyatga xos illatlarni koʻrish mumkin. Masalan, bu yerda ham kimdir bilan gaplashsam, oʻzi xohlagan narsani eshitgisi, oʻzi xohlagan narsani koʻrgisi keladi.
Insoniyatga xuddi axborot kerak emasdek. Ularning fikri, qarashlari, munosabatlarini, toshdek qotib ketgan yondashuvlarini parvarishlab, “uqalab”, ularga yoqadigan gaplarni aytsangiz boʻldi. Chunki ular hamma narsani biladigandek. Mana, Buxoroda Qoraqalpogʻiston boʻyicha sudni yoritdim, unga ham munosabat mana shunday. “Biz bilgan narsalarni ayt, bizni xursand qil”, — deyishayotgandek goʻyo.
Erkinlik — aslida masʼuliyat, erkinlik — tahliliy-tanqidiy fikrlash, erkinlik — “Men oʻzi kimman, jamiyatda oʻrnim qanday, muammolarni yechish uchun men nima qila olaman?” deb oʻylash. Oʻzbekiston mana shunga asta-sekinlik bilan yetib borganda, balki, biz ijtimoiy progress boʻldi, deya olarmiz, — deydi jurnalist.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)