O‘zbekistonda ming nafarga yaqin chin yetim talabalar davlat granti asosida o‘qitilmoqda. Bu haqda oliy taʼlim, fan va innovatsiyalar vazirining birinchi oʻrinbosari Komiljon Karimov “Daryo” nashriga bergan intervyusida ma’lum qildi.
Vazirlik rasmiysining aytishicha, hozirda ijtimoiy himoyaga muhtoj talabalarni qo‘llab-quvvatlashga e’tibor ortgan.
“Birinchi oʻrinda nogironligi boʻlgan, chin yetim talabalar, kam taʼminlangan oila farzandlari uchun oliy taʼlim olishga imkoniyat yaratilmoqda. Misol uchun, nogironligi boʻlgan talabalar uchun umumiy kvotadan ikki foiz oʻrinlar ajratilmoqda. OTMlarga kirishda ularga alohida tanlov amalga oshirilyapti. Chin yetimlar ham davlat hisobidan oʻqitilyapti. Bu yil ming nafarga yaqin chin yetim talabalar oʻqishga qabul qilindi va ular toʻliq davlat hisobidan oʻqitilmoqda.
Shu bilan birga, kam ta’minlangan xotin-qizlar uchun ham ikki mingta kvota ajratilgan. Shuningdek, besh yil stajga ega boʻlgan 500 nafar xotin-qizlarga ham kvotalar berilmoqda”, — dedi vazir o‘rinbosari.
Komiljon Karimovning qo‘shimcha qilishicha, talabalar soni 2017-yildan beri qariyb toʻrt baravar koʻpaydi.
“2017-yilda respublikada bor-yoʻgʻi 77 ta OTM boʻlgan. Bugungi kunga kelib, rasmiy litsenziyaga ega boʻlgan OTMlar soni 209 taga yetdi. Shundan 65 tasi nodavlat, 30 tasi xorijiy OTMlar filiallari hisoblanadi. Hozirda jami talabalar soni bir million nafardan oshdi. 2017-yilda bu son 250 ming nafar boʻlgan. Bu toʻrt baravar koʻp oʻsish degani”, — deya ta’kidladi vazirlik rasmiysi.
Avvalroq Komiljon Karimov “Daryo” nashriga bergan intervyusida oliy ta’lim tizimida so‘ngi olti yilda kuzatilgan muhim oʻzgarishlar haqida gapirgandi.
Izoh (0)