Kino ijodkorlar tomonidan ishora qilingan, ammo ko‘pchilik payqamagan mashhur filmlardagi detallar (foto)

Kechqurun kino yoki serial tomosha qilish kinomanlar uchun katta quvonchdir. Lekin hech kim payqamagan ishoralarni anglash o‘zgacha zavq beradi. Masalan, “Uenzdey” serialining 1-qismidayoq yovuz bosh qahramon kimligiga ishora qilingan.

“Uenzdey”

1-qismdayoq serial ijodkorlari asosiy yovuz odam kimligini dadillik bilan ko‘rsatishgan. Yotoqxonaga kirgach, botanika o‘qituvchisi Uenzdeyga qora georgin (kartoshkagul) beradi. Aynan o‘sha gulni u keyinchalik uchrashuvda Taylerdan oladi.

Qora georgin 1947-yilda Los-Anjelesda sodir etilgan va haligacha ochilmagan haqiqiy jinoyatni yodga soladi. Shuning uchun kartinada mash’um gulning ikki marta paydo bo‘lishi yaxshilikka olib kelmaydi. Tornhill xonim va Tayler Nevermorni yo‘q qilish uchun birlashganligidan ajablanmasa ham bo‘ladi.

Quzg‘unlar balida oq rangdagi kiyim kiyish ham ramziy ma’noga ega. Oq qarg‘a tabiatda kam uchraydi va u noyob tur, o‘ziga xos narsani ramziy qilishi yoki dahshatli alomat bo‘lib xizmat qilishi mumkin.

Serialning ushbu epizodida ikkala holatni ham ko‘rish mumkin: Uenzdey kelishgan yigit bilan raqsga tushmoqda, ayni shu paytda maktab tashqarisida yirtqich hayvon do‘sti Yujinga hujum qilmoqda.

“O‘qdan tez”

Chenning Tatum poyezd yo‘lovchisi sifatida paydo bo‘ladi. O‘zining ekrandagi qisqa chiqishi davomida aktyor yumshoq muqovali sentimental romanni o‘qiydi. Bu esa yilning yana bir yangiligi – “Yo‘qolgan shahar” sarguzasht filmiga havola.

Unda xuddi “O‘qdan tez” filmidagi kabi Sandra Bullok va Bred Pitt bosh rollarni ijro etishgan. Chenning Tatum “Yo‘qolgan shahar”da ishqiy romanlarning muqovalarida model bo‘lib ishlagan erkak rolini o‘ynaydi.

Shahzoda nomi bilan tanilgan qiz esa butunlay boshqa kitobni ishtiyoq bilan o‘qiydi. Yosh xonim safar uchun “Shibumi” romanini oladi. Asar qasos olishga ahd qilgan zamonaviy samuray haqida hikoya qiladi. Bu tanlov qahramonning shafqatsizligiga, shuningdek, u o‘zini kim deb bilishiga ishora qiladi.

“Menyu”

Margo va oshpaz Julian Slovik o‘rtasidagi suhbat uning kabinetida bo‘lib o‘tadi. Orqa fonda turli xil ish ma'lumotlari va buxgalteriya yozuvlarini o‘z ichiga olgan papkalarga ega javonni ko‘ramiz.

Internet foydalanuvchilaridan birining so‘zlariga ko‘ra, papkalardagi yozuvlar 2019-yildan keyin oshpaz restoran mijozlari bilan gaplashishni to‘xtatganiga ishora qilmoqda — uning uchun ular shunchaki qasos olish rejasining bir qismi bo‘lib qolgan. Shuning uchun 2019-yildan keyin faqat taomlar ro‘yxati bo‘lgan papkalar mavjud.

“Sehrlangan malika-2”

Kiyim do‘konidagi sahnada manekenlarda Disney malikalarining liboslarini ko‘rish mumkin. Ular orasida Bell va Oppog‘oyning liboslari bor. Aytgancha, kiyimlar oldidagi stollarda ushbu qahramonlarning asosiy atributlari ko‘rinishidagi aksessuarlar mavjud: olma va atirgul.

“Avatar: Suv yo‘li”

Bosh qahramonning asrab olingan qizi franshizaning 1-filmida qahramon Sigurni Uiverga tegishli bo‘lgan marjondan ajralmaydi. Gap shundaki, sujetga ko‘ra, Kiri uning qizi. Oilaviy meros orqali “Avatar” ijodkorlari 1 va 2-film qahramonlari o‘rtasida aloqa o‘rnatadilar.

“Yo‘q”

Jordan Pilening “Yo‘q” ilmiy-fantastik trilleri Stiven Spilbergning “Suyaklar”, “Uchinchi darajadagi yaqin aloqalar” va “Yura davri parki” kabi mashhur filmlariga ko‘plab havolalarni o‘z ichiga oladi. Ularning barchasida xavfli notanish odam, odamga o‘xshamaydigan mavjudot bilan to‘qnashuv haqida hikoya qilinadi.

Spilbergda ham, Pilda ham musofirlar kamuflyaj qilish uchun bulutlardan foydalanadilar. “Uchinchi darajadagi yaqin aloqalar”da begona kema yorqin to‘q sariq bulut ichida qahramonning uyi ustida aylanib yuradi. “Yo‘q” filmida qahramonlar tasvirdagi bulutlardan biri harakat qilmayotganini payqab, o‘zga sayyoralik joylashuvini aniqlaydi.

“Ajdaho uyi”

Bir epizodda Renira shaharga qochish uchun Qizil qo‘riqxonadagi yashirin tunnellardan foydalanadi. U o‘tish xaritasini amakisi Deyemondan oladi.

Tunnellar bir vaqtlar Zolim deb nomlanuvchi Megor Targaryen tomonidan ishlab chiqilgan. Deyemon avval ham Megorga qiyoslangan va uning xonasidagi maxfiy eshik haqida Reniraga aytgani ham shahzodani sobiq qirolga qiyoslashning yana bir usulidir.

Limonli keks “Taxtlar o‘yini” filmidagi Sansa Starkning eng sevimli shirinligi edi. “Ajdaho uyi”da Renira ham xuddi shu shirinlikni yaxshi ko‘radi, lekin o‘ziga xos tarzda. Malika tortni bezab turgan limon bo‘lagini yeydi, qolgan hech narsaga qo‘l tekkizmaydi. Ba’zi tomoshabinlar bu shunchaki ishora emas, balki Renirani tavsiflashning bir usuli deb hisoblashadi: u faqat o‘zini va istaklarini o‘ylab, shirinlik ko‘rinishini buzadi.