Shavkat Mirziyoyev 2-fevral kuni Farg‘ona viloyatiga tashrifi chog‘ida Global textile infinity to‘qimachilik korxonasini ko‘zdan kechirdi. Bu haqda Prezident matbuot xizmati xabar qildi.
Qayd etilishicha, bu yerda paxta yetishtirish va uni qayta ishlashning to‘liq jarayoni yo‘lga qo‘yilgan. 132 million yevro evaziga katta fabrika tashkil etilib, Shveysariyaning Rieter machine works uskunalari o‘rnatilgan. Korxona yiliga 18 million metr aralash mato hamda 10 million dona tayyor mahsulot ishlab chiqarish quvvatiga ega. Yevropa davlatlari va Xitoyga 85 million yevrolik mahsulot eksport qilish rejalashtirilgan. Buning uchun korxonada sifat laboratoriyasi tashkil etilgan. Prezident tayyor mahsulotlar turini ko‘paytirish, taniqli brendlar bilan hamkorlik o‘rnatish zarurligini ta’kidlagan. 2023-yil martda to‘qima mato ishlab chiqarish yo‘lga qo‘yiladi.
Korxonada qo‘shimcha ishga tushirilayotgan obyektlar: Uchko‘prik tumanida loyiha qiymati 35 million yevrolik ip-kalava va mato ishlab chiqarish hamda 15 m.illion dollarlik paxtani qayta ishlash korxonalari.
Yaratiladigan ish o‘rni: jami 4 800 ta, shundan:
- Qo‘shtepa tumanida – 3000 ta,
- Uchko‘prik tumanida – 1800 ta.
Bundan tashqari, ishlab chiqarishda energiya tejamkor texnologiyalar qo‘llanmoqda. Inshootning tom qismiga quyosh panellari o‘rnatilmoqda. Bularning natijasida qariyb 23 foizgacha energiya samaradorligiga erishish mumkin.
Hozirgi birinchi bosqichda fabrikada 1 ming 500 nafar kishi ishlamoqda. Joriy yil martda fabrikada to‘qima mato ishlab chiqarish boshlanadi. Shuningdek, Uchko‘prik tumanida ip-kalava va mato tayyorlash hamda paxtani qayta ishlash korxonalari tashkil etilmoqda. Shunda klasterdagi jami ish o‘rni 4 ming 800 taga yetadi. Bu yerda o‘quv va kasanachilik markazi ham ochilgan. Unda korxona uchun zarur 4 ta yo‘nalishda mutaxassislar tayyorlanmoqda.
Ushbu klaster majmuasida vodiy viloyatlarida paxta-to‘qimachilik sanoatini rivojlantirish masalalari bo‘yicha yig‘ilish o‘tkazilgan. O‘tgan olti yilda bu viloyatlarda 35 ta klaster tashkil etilib, 670 million dollarlik 150 dan ortiq yirik loyiha ishga tushirilgan.
26-yanvarda paxtachilik klasterlari faoliyatini qo‘llab-quvvatlashga oid Prezident qarori qabul qilingan. Unga ko‘ra, klasterlar paxta yetishtirishga o‘g‘it, urug‘, yoqilg‘i uchun imtiyozli kreditlarni istalgan vaqtda olish imkoniga ega bo‘ldi. Ularga g‘o‘za navlarini mustaqil joylashtirish, chetdan hosildor navlarni seleksiya uchun olib kelishga ruxsat berilgan.
Shuningdek, lazerli tekislagichlarni sotib olishda ular qiymatining 30 foizi budjetdan qoplab beriladi. Ishlab chiqarishni ilm bilan bog‘lash maqsadida har bir klasterga paxtachilik ilmiy tashkilotlari va agroxizmat markazlari biriktiriladi.
Yig‘ilishda mazkur chora-tadbirlarning amaliy jihatlariga to‘xtalib o‘tilgan.
Paxta hosildorligini oshirish, ip-kalavani chuqur qayta ishlab, tayyor mahsulotlarni ko‘paytirish bo‘yicha ko‘rsatmalar berilgan. Vodiy viloyatlarida to‘qimachilik mahsulotlari eksportini joriy yilda 2,5 milliard dollarga yetkazish imkoniyati borligi ta’kidlangan.