Qozog‘istonning Arbat.media internet nashri Ukrainadagi urush haqidagi material tufayli Rossiyaning Vladimir shahridagi Leninskiy tuman sudiga chaqirildi. Tahririyatga kelib tushgan sud qog‘ozining skaneri 31-yanvar kuni e’lon qilindi.
Nashrga nisbatan Rossiya armiyasining 56680-harbiy qism, 19-harbiy prokuraturasi tomonidan ma’muriy da’vo qo‘zg‘atilgan. Hujjatni armiya harbiy prokurori o‘rinbosari, adliya kapitani V.A. Bazhenov imzolagan. Ushbu ish bo‘yicha sud majlisi 17-fevralga belgilangan.
Xabarda aytilishicha, “Roskomnadzor”ning Vladimir viloyati bo‘yicha boshqarmasi Arbat.media veb-saytida Rossiyaning Ukraina hududidagi “maxsus harbiy operatsiyasi haqida haqiqatga to‘g‘ri kelmaydigan, siyosiy xarakterdagi ijtimoiy ahamiyatga ega yolg‘on ma’lumotlar”ni aniqlagan.
Bundan tashqari, xabarnomada Arbat.media veb-saytidagi materiallardan biri Ukrainada davom etayotgan “maxsus operatsiya”ning maqsadlarini noto‘g‘ri, rasmiy Rossiya pozitsiyasiga zid talqin qilgani va “norozilik kayfiyatini yaratishga mo‘ljallangan”i da’vo qilingan.
Nashrning yozishicha, sud jarayoniga Xarkov viloyatidagi harbiy harakatlar haqida sentabrda e‘lon qilingan material sabab bo‘lgan. 2022-yil noyabr oyida “Roskomnadzor” Arbat.media’dan ushbu maqolani o‘chirib tashlashni talab qilgandi. Rossiya departamenti so‘nggi oylarda qozoq ommaviy axborot vositalariga bunday maktublarni faol ravishda jo‘natmoqda. Xususan, dekabr oyida “Roskomnadzor” Informburo.kz saytidan Ukrainadagi mojaro haqidagi sharhlardan birini olib tashlashni talab qilgandi. Xuddi shunday so‘rovlar Vlast.kz internet nashri muharrirlariga ham kelib tushgan.
Arbat.media qozog‘istonlik tadbirkor Armanjan Baytasovning tashabbusi bilan ochilgan. Yangi media 2022-yilning bahoridan beri ishlamoqda. U o‘zini sobiq Ittifoq mamlakatlaridagi muhim ijtimoiy va siyosiy voqealardan xabardor qiluvchi “Yevrosiyo axborot-tahliliy platformasi” sifatida ko‘rsatadi.
Izoh (0)