“Pop va Fargʻona tumanlarida 600 Megavattli 2 ta quyosh stansiyasi quriladi” — prezident

Ayni vaqtda prezident Shavkat Mirziyoyev Yangi Andijon tumanida viloyat faollari va masʼullar ishtirokida videoselektor yigʻilishini oʻtkazmoqda. Bu haqda “Daryo” muxbiri xabar berdi. 

Prezident yirik quyosh va shamol stansiyalari loyihalarini tezlashtirish kerakligini taʼkidladi. 

“Bu yil Pop va Fargʻona tumanlarida 600 Megavattli 2 ta quyosh stansiyasi quriladi.  Shuningdek, Yangi Andijondagi 192 ta koʻp qavatli uylar va 6 ta ijtimoiy obyektlarni kafolatli issiqlik bilan taʼminlash uchun 20 Megavatt quvvatli koʻmirda ishlaydigan kogeneratsiya loyihasi amalga oshiriladi.

Ushbu stansiya issiqlik bilan birga yiliga 80 mln kVt soat elektr energiya ishlab chiqaradi. Uning 1-bosqichi joriy yil dekabrda ishga tushadi”, — dedi davlat rahbari

Prezident vodiy viloyatlarida 160 Megavattli quyosh panellari va 100 ta mikro GESlar qurilishini  aytdi

“1-iyulga qadar Andijonda 41 ta, Namanganda 32 ta va Fargʻonada 27 ta mikro GES qurish boshlanadi. Bu ishlarni joylarda toʻgʻri tashkil etish, masalalarni hal qilish uchun viloyat hokimlarining 1-oʻrinbosarlari masʼul boʻladi va hamma ishlardan ozod qilinadi. Ularga respublika bank rahbarlari biriktiriladi. 

Yil oxirigacha ularning qolgan vazifalarini viloyat soliq boshqarmasi va Markaziy bank boshqarma boshliqlari bajaradilar”, — dedi Shavkat Mirziyoyev.