O‘zbekistondan 2022-yilda 8,8 ming kishi ko‘chib ketdi

2022-yil yanvar—dekabr oylarida O‘zbekistondan xorijga 8,8 ming nafar inson ko‘chib ketgan. Bu haqda Statistika agentligi xabar qildi.

Qayd etilishicha, ko‘rsatkich, so‘nggi 5 yilda sezilarli kamaygan, ya’ni 2018-yilga nisbatan 8,8 mingtaga yoki 50,0 foizga qisqargan. Ko‘chib ketganlar orasida erkaklar 4,1 ming kishini, ayollar 4,7 ming kishini tashkil etgan.

O‘zbekiston Respublikasidan xorijiy mamlakatlarga ko‘chib ketganlarning asosiy qismi Qozog‘iston Respublikasi (jami 79,5 foiz), Rossiya Federatsiyasi (16,4 foiz), Qirg‘iziston Respublikasi (0,7 foiz), Tojikiston Respublikasi (0,5 foiz), Turkmaniston Respublikasi (0,3 foiz) va boshqa mamlakatlar (2,6 foiz) hissasiga to‘g‘ri kelgan.

Bundan tashqari, 2022- yil yanvar-dekabr oylarida respublika bo‘yicha doimiy yashash maqsadida ko‘chib kelganlar jami soni 214 821 kishini tashkil etgan. Shundan respublikaning boshqa hududlaridan ko‘chib kelganlar 212 499 kishini, xorijiy mamlakatlardan ko‘chib kelganlar 2 322 kishini tashkil etadi.

Doimiy yashash maqsadida ko‘chib ketganlar soni jami 221 288 kishini ko‘rsatib, migratsiya saldosi minus -6 467 kishiga to‘g‘ri kelgan.