OKMK: Yangi texnologiya asosida volframli qattiq qotishmalar tarkibidan 96,0 foiz kobalt metali ajratib olishga erishildi

Olmaliq kon- metallurgiya kombinatida ilm fan va ishlab chiqarish integratsiyasi tufayli koʻplab yutuqlarga erishilmoqda. Jumladan, kombinatning Nodir metallar va qattiq qotishmalar ishlab chiqarish birlashmasi qoshidagi oʻzbek-koreys ilmiy texnologik markazi mutaxassislari tomonidan volfram tarkibli chiqindilardan 96,0 foiz kobaltni ajratib olishga erishildi. Volfram chiqindilaridan ajratib olingan kobalt metallini qayta ishlab chiqarishga jalb qilish boʻyicha anchadan buyon samarali ishlar olib borilmoqda.

Kobalt asosan metallardan kesuvchi asboblar tayyorlashda ularning yemirilishga bardoshli va chidamliligini oshirishda muxim ahamiyat kasb etadi. Shu bois yangi texnologiya asosida ajratib olinadigan kobaltdan metallarga ishlov berish uchun kesuvchi asboblar tayyorlanib, ishlab chiqarish jarayonlariga jalb qilish asosiy maqsad qilib qoʻyilgan.

Shu oʻrinda taʼkidlash joizki, ayni paytda dunyo bozorida kobaltga boʻlgan talab taklifdan kamida 10 foiz oshib bormoqda, yaʼni yetmagan kobalt miqdori chiqindilardan ajratib olinmoqda.

Kobalt va uning birikmalari sanoatning turli sohalarida qoʻllaniladi. Masalan, radio–texnika, rangli metallurgiya, poʻlat qotishmalar tayyorlashda, litiy ion batareyalarning elektrodlari, katalizatorlar shular jumlasidan. Eʼtiborlisi, respublikamizda kobalt 100 foiz import mahsulot xisoblanadi. Taxminlarga koʻra, 2030-yilga kelib, dunyoda birinchi ishlab chiqarilgan elektromobillar eskira boshlaydi. Shunda ushbu batareyalarni qayta saqlash, qayta ishlash hamda kobalt metallini ajratib olish yanada dolzarb masala boʻlib qoladi. Ishlab chiqilgan yangi texnologiya, kelajakda elektromobillarning, smartfonlarning ishdan chiqqan litiy akkumulyatorlaridan kobaltni ajratib olishga qoʻllanilishi uchun poydevor boʻlib xizmat qiladi va eng muhimi atrof muhitni himoya qilishda keng qoʻllaniladi. Bir soʻz bilan aytganda, volframli qattiq qotishmalar ishlab chiqarish sohasida chiqindisiz texnologiya yaratishda muhim omil boʻlib xizmat qiladi. Hozirgi kunda sinov jarayonlari muvaffaqiyatli oʻtkazishga erishildi va ishlab chiqarishga joriy qilindi.

Reklama huquqi asosida.