Italiyada erkak oilasini tortga almashgan xotinini sudga berdi. Ayol qamalishi mumkin 

Italiyaning Verona shahrida yashovchi erkak internetda mashhur bo‘lishga qaror qilgan rafiqasi ustidan sudga murojaat qildi. Bu haqda Corriyere della Sera xabar berdi.

Ma’lum qilinishicha, 41 yoshli ayol braziliyalik bo‘lib, mashhurlik qozonish maqsadida tortlar xarid qilib, shirinliklarni tatib ko‘rgan videosini tarmoqlarda joylagan. O‘zini internetda “tabassumli va faol” qilib ko‘rsatgan ayol, oila davrasida qo‘pol ekani aytilmoqda.

Da’vo arizasida er ayoli “mashhur” bo‘lishni istashi ortidan hatto ikki farzandiga g‘amxo‘rlik qilish mas’uliyati unga yuklatib qo‘yganini aytdi. Bundan tashqari, bolalar onaning jahldorligidan azob chekishi, ayol g‘azablanib, o‘yinchoqlarni sindirishi ta’kidlandi.

Ayol tortlarni buyurtma qilib, onlayn tomoshabinlar oldida ularni yolg‘iz iste’mol qilgan. Er esa har birining narxi 250 yevrodan boshlanadigan tortlar uchun pul to‘lagan, sababi ayol ishlamagan. Sud jarayonida ayol eriga nisbatan zo‘ravonlik qo‘llaganini ham tan olgan. U “psixologik zo‘ravonlik”ka javoban erini televizor pulti bilan urganini aytgan.

Dastlabki tergov sudi unga o‘z oilasiga yaqinlashishni taqiqladi, qoidabuzarlik uchun ayol qamoqqa tushishi mumkin. Ayblanuvchi hozirda dori vositalaridan foydalangan holda davolanmoqda.