“Daryo” kundaligida 1-fevralda sodir bo‘lgan eng muhim voqealar
“Daryo” nashri 1-fevralda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya elchilari o‘z lavozimlaridan ozod qilinmoqdami?
Yanvar oyi oxirida Rossiya Estoniya bilan diplomatik munosabatlar darajasi pasayganini e’lon qilib, mamlakat elchisidan Moskvani tark etishni talab qilgandi. Rossiya Tashqi ishlar vazirligi Tallinni “rusofobiya va Rossiyaga nisbatan dushmanlik siyosatida” bo‘lishda ayblagan. O‘z o‘rnida Estoniya Tashqi ishlar vazirligi bunga javoban Rossiya elchisining chiqarib yuborilishini e’lon qildi.
So‘nggi ma‘lumotlarga ko‘ra, Litva Tashqi ishlar vazirligi rahbari Gabrielyus Landsbergis Rossiya elchilarining Yevropa Ittifoqi mamlakatlarida qolishini bema’nilik, deb hisoblashini ma‘lum qildi.
“Yevropaning birorta poytaxtida elchi, Rossiya elchisining bo‘lishi mantiqqa to‘g‘ri kelmaydi. Aksariyat hollarda, bu endi diplomatik muassasa emas, balki urush jinoyatlarini yashiradigan va umuman genotsid dasturini targ‘ib qiluvchi propaganda muassasasi bo‘lib xizmat qilmoqda”, — deya Landsbergisning so‘zlaridan iqtibos keltirdi Delfi nashri.
Vazir jarayonga baho berar ekan, Litva 2022-yilning bahorida Buchada tinch aholining o‘ldirilishiga javoban Rossiya elchisini chiqarib yuborgani, yanvarda esa Estoniya va Latviya Rossiya elchilarini chiqarib yuborishini e’lon qilgani haqida eslatdi.
Ukraina ilk bor uzoq masofaga uchadigan raketalarni qabul qilib oladi
AQSH Ukrainaga 2,2 milliard dollarlik harbiy yordam paketini tayyorlamoqda, uning tarkibidan ilk bor uzoq masofali raketalar, shuningdek, boshqa o‘q-dori va qurollar joy oladi, deb xabar berdi Reuters o‘z manbalariga tayanib.
Keyinroq agentlik aniqlik kiritishicha, gap150 km masofaga ucha oladigan GLSDB (Ground Launched Small Diameter Bomb) raketalari haqida ketmoqda. Bu qurollar Boeing va Saab Group tomonidan ishlab chiqarilgan, ular M270 va HIMARS kabi yoppasiga o‘t ochuvchi reaktiv tizimlardan uchiriladi.
Iyun oyidan beri Qo‘shma Shtatlar Ukraina kuchlarini 20 ta HIMARS tizimlari va o‘q-dorilar bilan ta’minladi. Endilikda HIMARS uchun 80 kilometrgacha masofadagi nishonlarga zarba bera oladigan va sun’iy yo‘ldoshdan boshqariladigan GMLRS raketalari yetkazib berilmoqda.
Muxolifatni kuch bilan bostirishda ayblangan ikki prezident va ularning g‘arb sanksiyalariga tushgan davlatlari o‘rtasidagi hamkorlik
Belarus prezidenti Aleksandr Lukashenko uch kunlik davlat tashrifi bilan Zimbabvega keldi. Bu Belarus prezidentini Afrika davlatiga birinchi tashrifi, deb xabar bermoqda Euronews.
Zimbabve Tashqi ishlar vazirligi ma’lum qilishicha, ikki davlat rahbarlari oʻrtasida rejalashtirilgan muzokaralar siyosat, togʻ-kon va qishloq xoʻjaligi kabi sohalarda ikki davlat oʻrtasidagi “mavjud ajoyib munosabatlar”ni mustahkamlashga qaratilgan.
Mutaxassislar bu ikki davlatni birlashtirib turgan omil G‘arbning ularga nisbatan qo‘ygan sanksiyalari ekanini ta’kidlaydi. “G‘arb tomoni mamlakatlarimizni jazolamoqchi, ammo ular bunga erisha olmaydi, chunki ikki davlatning rivojlanish strategiyasi o‘zimizni o‘zimiz ta’minlashga qaratilgan”, — dedi Xarare provinsiyasidagi ZANS-PF partiyasi raisi Godvils Masimirembva.
Sanksiyalar bilan bir qatorda ikki prezidentni ularga nisbatan inson huquqlarini buzish, jumladan, muxolifatni kuch bilan bostirish ayblovlari ham birlashtiradi. Mutaxassislarning fikricha, diplomatik izolyatsiya sharoitida har ikki davlat xalqaro munosabatlarini diversifikatsiya qilishga intilmoqda.
”BelTA” agentligi xabariga koʻra, Lukashenkoning tashrifi doirasida Zimbabve va Belarus oʻrtasida investitsiyalarni rag‘batlantirish va birgalikda himoya qilish, ta’limga oid hujjatlarni o‘zaro tan olish haqidagi memorandum, ikki tomonlama soliqqa tortishning oldini olish to‘g‘risida kelishuvlar imzolangan.
Bundan tashqari tomonlar Belarus traktori va g‘alla yig‘im-terim texnikasini, shuningdek, don saqlash komplekslarini qurish va modernizatsiya qilish uchun uskunalarni yetkazib berishni shartnomalar bo‘yicha tasdiqlashdi.
O’zbekistonga 1 trln 12 mlrd so‘mlik zarar olib kelgan mansabdorlar
O‘zbekistonda 2022-yil davomida respublika bo‘yicha jami 2 965 ta jinoyat ishi bo‘yicha 3 116 nafar mansabdor shaxslar jinoiy javobgarlikka tortildi. Bu haqda Bosh prokuratura xabar berdi.
Jinoyati fosh qilingan mansabdor shaxslarning 110 nafari respublika, 264 nafari viloyat va 2 742 nafari tuman (shahar) miqyosidagi vazirlik, idora va tashkilotlarda faoliyat yuritgan.
Jinoiy javobgarlikka tortilgan mansabdor shaxslarning 2103 nafari o‘zganing mulkini o‘zlashtirish va rastrata yo‘li bilan talon-toroj qilish, 265 nafari mansab mavqeyini suiiste’mol qilish, 243 nafari firibgarlik, 169 nafari poraxo‘rlik, 51 nafari mansab soxtakorligi, 22 nafari mansabga sovuqqonlik bilan qarash, 14 nafari mansab vakolati doirasidan chetga chiqish va boshqa jinoyatlarni sodir etgan.
Mansabdor shaxslarning jinoyatlari oqibatida davlat va jamiyat manfaatlariga 1 trillion 12 milliard so‘m miqdorida moddiy zarar yetkazilgan bo‘lib, tergov jarayonida ushbu zararning 847 milliard so‘mi undirilgan.
