Belarus chempioni “Shaxtyor Soligorsk” kelishilgan o‘yin sabab chempionlikdan mahrum etilishi mumkin

Soligorskning “Shaxtyor” klubi vakili kelishilgan o‘yinda ishtirok etganlikda gumon qilinmoqda.

Belarus huquqni muhofaza qilish organlari tomonidan klub xodimiga nisbatan (sport musobaqasi ishtirokchilarini qasddan sotib olish bo‘yicha) jinoiy ish qo‘zg‘atilgan.

Xabarlarga ko‘ra, gap “Shaxtyor”ning Belarus chempionati 30-turi doirasidagi “Belshina”ga qarshi o‘yini (4:1) haqida bormoqda. Ushbu o‘yinda soligorskliklar chempionlik masalasini hal qilgandi.

“Belshina” futbol klubi sardori Dmitriy Gomza yanvar oyi o‘rtalarida politsiya tomonidan hibsga olingan. Biroq buning sababi ma’lum qilinmagan. Qayd etish kerak, Gomza shubha ostiga olinayotgan o‘yin vaqtida o‘z darvozasi tomon penalti keltirgandi.

“Shaxtyor Soligorsk” Belarus chempionatida eng yaqin ta’qibchisi “Energetik-BGU”ni 5 ochkoga ortda qoldirib, ketma-ket uchinchi marta chempionlikni qo‘lga kiritgandi. Ayrim xabarlarga ko‘ra, “Shaxtyor” ushbu ishda aybdor deb topilsa, chempionlik “Energetik-BGU”ga berilishi mumkin.

Minskliklar safida o‘zbekistonlik futbolchi Bobur Abduxoliqov ishtirok etgan va 26 ta gol bilan mavsumning eng yaxshi to‘purariga aylangandi.