G‘arbiy Avstraliyada Rio Tinto kon kompaniyasi xodimlari yanvar oyi o‘rtalarida katta yo‘lda tushirib qoldirgan seziy-137 li radioaktiv kapsula nihoyat topildi. Bu haqda ABC News xabar bermoqda.
6 ga 8 millimetr o‘lchamdagi kapsulani 1400 kilometrlik yo‘ldan qidirishayotgandi — u Nyuman shahri yaqinida, yo‘l chetidan ikki metr narida topildi. G‘arbiy Avstraliya favqulodda xizmatlar vaziri Stiven Doson qidiruv natijalarini “g‘ayrioddiy” deb atadi va qidiruv guruhlari “somon uyumidan igna topgani”ni ta’kidladi.
An image of the capsule is below - pic.twitter.com/pbbtfZWEN9
— Chief Health Officer, Western Australia (@CHO_WAHealth) January 27, 2023
O‘z navbatida, Rio Tinto rahbari Saymon Trott qidiruvda ishtirok etgan barchaga minnatdorlik bildirdi. U qidiruv operatsiyasiga ketgan davlat xarajatlarini qoplab berishni va’da qilib, kapsulani yo‘qotgani uchun uzr so‘radi. Shu bilan birga, Trott zararni qoplash bo‘yicha qarorni davlat organlari qabul qilishi kerakligini qo‘shimcha qildi.
Tarkibida seziy-137 bo‘lgan radioaktiv kapsula yanvar oyining o‘rtalarida yo‘qolgan, ammo bu haqda oy oxiriga kelibgina ma’lum bo‘lgandi. Qidiruv bir necha kun davom etdi, dastlab Avstraliya rasmiylari mitti kapsula katta yo‘ldan o‘tib ketayotgan birorta mashina shinasiga tiqilib qolgan bo‘lishi mumkinligidan qo‘rqdi. Biroq bunday bo‘lmagan va mutaxassislarning fikricha, kapsula yuk mashinasidan tushib qolgan joyidan siljimagan.
O‘z-o‘zidan kapsula fuqarolar uchun jiddiy xavf tug‘dirdi. Xususan, seziy-137 ning teriga tegishi kuyish va nurlanish kasalligi xavfini keltirib chiqaradi, kapsuladan tarqaladigan nurlanish esa soatiga 10 rentgenga teng, bu uzoq vaqt davomida ta’sir qilsa, saratonga olib kelishi mumkin.
Izoh (0)