“Xalqaro huquqni buzish“: Human Rights Watch tashkiloti Ukrainani taqiqlangan minalardan foydalanganlikda aybladi (foto)

Inson huquqlarini himoya qiluvchi Human Rights Watch tashkiloti Ukraina armiyasi taqiqlangan “yaproqli minalardan” foydalanayotganini da’vo qildi. Bu haqda tashkilot saytida xabar berildi.

Ma’lum qilinishicha, bunday faktlar Izyum viloyatida kuzatilgan. Izyum sharqida va uning atrofida piyodalarga qarshi minalar topilgan. Shahar Xarkov viloyatida joylashgan. Huquq faollari Ukraina Qurolli kuchlari tomonidan “yaproqli minalar” qo‘llanganini hujjatlashtirgan. Ukraina 1997-yildagi minalarni taqiqlash shartnomasining a’zosi bo‘lgani sababli piyodalarga qarshi har qanday minalardan foydalanish taqiqlangan.

“Ukraina kuchlari Izyum hududida keng tarqalgan minalarni tarqatib yuborgan ko‘rinadi, bu tinch aholining qurbon bo‘lishiga olib keladi va davomiy xavf tug‘diradi”, — dedi Human Rights Watch’ning qurol bo‘yicha direktori Stiv Guz.

Shu bilan birga, u Rossiya armiyasi bir necha bor “yaproqli minalar”dan foydalangani, biroq bu ularning Ukraina tomonidan qo‘llanishini oqlamasligini qayd etdi.

Bunday minalar samolyotlardan, raketalardan va artilleriyadan yoki maxsus ishga tushirish moslamalaridan tashlanadi. Ulardan foydalanish xalqaro gumanitar huquqni ham buzadi. PFM “yaproqli minalar” tinch aholi va jangchilarni ajrata olmaydi.

Izyum atrofidagi 9 ta tumanning barchasida “yaproqli minalar” bor, huquq himoyachilarining ta’kidlashicha, ular Rossiya qo‘shinlari bosib olingan hududlarda bo‘lganida joylashtirilgan.

Mudofaa vazirligi huquq himoyachilarining Ukraina o‘z xalqaro majburiyatlarini bajarishi, jumladan, piyodalarga qarshi har qanday minalardan foydalanishni taqiqlash haqidagi so‘roviga javob berdi. Biroq urush tugaguniga qadar qo‘llangan qurol turlari haqidagi ma’lumotlarga "izoh berilmasligi” ta’kidlandi.

“Piyodalarga qarshi minalardan har qanday usulda foydalanish noqonuniy hisoblanadi va Ukraina nima bo‘lganini chuqur o‘rganib chiqishi va o‘z kuchlari ulardan foydalanmasligiga ishonch hosil qilishi kerak”, — dedi Stiv Guz.

Sky News ma’lumotiga ko‘ra, Ukraina dunyodagi eng ko‘p minalangan davlatga aylandi. Harbiy harakatlar sababli Ukraina hududining 40 foizdan ortig‘i minalangani ma’lum qilindi.