Farg‘onada mingga yaqin xonadonni elektr energiya bilan taʼminlovchi quyosh fotoelektr stansiyasi ishga tushirildi (foto, video)
Farg‘ona viloyatdagi eng yirik quyosh fotoelektr stansiyasi ishga tushirildi. “Daryo” muxbiri mazkur stansiyada bo‘lib, uning imkoniyatlari haqida reportaj tayyorladi.
Farg‘ona issiqlik elektr markazida foydalanishga topshirilgan quyosh fotoelektr stansiyasining loyiha qiymati 14,1 milliard so‘mni tashkil etadi.
2022-yilning may oyida qurilishi boshlangan ushbu loyihaning yakuniy tajriba sinov bosqichlari tugallandi va quvvati 1800-2000 kVt soat bo‘lgan quyosh fotoelektr stansiyasidan foydalanish boshlandi.
2 gektar maydonda joylashgan mazkur quyosh fotoelektr stansiyasining ishga tushirilishi natijasida yillik qo‘shimcha 5 million kVt soat elektr energiya ishlab chiqarish imkoniyati yaratildi.
Shuningdek, mana shuncha elektr energiya ishlab chiqarish uchun sarflanadigan 1,2 million kub metr tabiiy gaz va 300 ming kVt soat elektr energiya iqtisod qilinadi. Hisob-kitoblarga ko‘ra, stansiyaning iqtisodiy samarasi yillik 300 ming dollarni tashkil etadi va 7 yilda qilingan xarajatlarni to‘la qoplashi ko‘zda tutilgan.
Bu yerda olingan muqobil energiya hisobiga Farg‘ona shahrining Qirguli mavzesidagi isteʼmolchilarning elektr energiyaga bo‘lgan ehtiyojini uzluksiz taʼminlashga bosiqma-bosqich erishiladi.
Mutaxassislarning maʼlumotlariga ko‘ra, quyosh fotoelektr stansiyalari ikki xil uslubda – on grid va of grid rejimlarida ishlaydi. Mazkur quyosh fotoelektr stansiyasi on grid uslubida, yaʼni quyoshdan olingan elektr energiyani to‘g‘ridan to‘g‘ri tarmoqqa yetkazish rejimida ishlaydi.
Mazkur stansiyada 2 ming 816 dona quyosh paneli o‘rnatildi. Har bir quyosh panelining quvvati 865 vatdan iborat. Quyosh fotoelektr stansiyasi 16 bo‘limdan tashkil topgan bo‘lib, har bir bo‘lim 125 kVt quvvatga ega. Mana hozirga vaqtda 750 kVt soat elektr energiya ishlab chiqarishni boshladi. Bu 350-400 ta xonadonni elektr energiya bilan taʼminlashga yetadi. Yoz kunlarida stansiyamiz to‘liq quvvat berishni boshlaydi. Stansiya to‘la quvvat bilan ishlaganda 1000 ga yaqin xonadonni energiya bilan taʼminlaydi. Ochiq tarmoq rejimida ishlaganda stansiya kun davomida quyoshdan maksimal energiyani olib tarmoqqa bevosita uzatadi. Berk tarmoq rejimida ishlaganda quyosh energiyasini maxsus akkumulyatorlarga to‘ldiradi va kechqurun isteʼmolchilarga yetkazib berishni taʼminlaydi, — deydi “Farg‘ona issiqlik elektr markazi”ning elektr sexi boshlig‘i Alisher Mo‘minov.
Mazkur quyosh foto elektr stansiyasiga o‘rnatilgan quyosh panellari uchun 25 yil kafolat berilgan. Yana 7 yildan so‘ng bu yerda harajatsiz yillik 5 million kVt soat elektr energiyadan foydalanish mumkin bo‘ladi.
