Britaniya yadroviy kemasi super yelim bilan ta’mirlangani aniqlandi. Holat bo‘yicha tergov boshlandi
Buyuk Britaniyaning yadroviy suv osti kemasi murvatlari super yelim yordamida mustahkamlangani aniqlandi. Bu haqda manbalarga tayanib, The Sun xabar berdi.
Ma’lum qilinishicha, Vanguard suv osti kemasini tekshirish chog‘ida yadro reaktori uchun sovitish suyuqligi solingan quvurlardagi murvatlardan birining singan boshi topilgan. Keyinchalik bunday murvatlar soni kamida yettita ekani ma’lum bo‘lgan.
Plimutdagi bazadagi ishchilar murvatlarni mustahkamlash paytida uni sindirib yuborgan. Biroq, singan murvatlarni burg‘ilash va ularni yangilari bilan almashtirish o‘rniga, ishchilar shunchaki super yelimdan foydalangan. The Sun’ning yozishicha, bazadagi ishlar belgilangan rejadan to‘rt oyga ortda qolmoqda. Ehtimol, ishchilar ta’mirlash muddatlarini buzmaslik uchun super yelimdan foydalanishga qaror qilgan. Shu bilan birga, suv osti kemasini ta’mirlash uchun Britaniya budjetidan taxminan 300 million funt sterling ajratilgan.
Voqeadan keyin Britaniya Mudofaa vaziri Ben Uolles g‘azablangan. Pudratchi kompaniya yadroviy suv osti kemasini ta’mirlash paytidagi qonunbuzarliklar uchun shaxsan unga hisobot bergan.
Dengiz floti manbalaridan biri vaziyatni “sharmandali” deb atagan va “Yadro standartlari hech qachon buzilmasligini” aytgan. Suvosti kemasining sobiq kapitani Rayan Ramsay esa yana nimalar shunday ta’mirlangan bo‘lishi mumkinligi haqidagi savol uni o‘ylantirgani ta’kidlagan.
Hozirda Britaniya harbiy-dengiz kuchlari pulni tejashga va super yelimga murvat yopishtirishga qaror qilgan aybdor ishchilarni tergov qilmoqda va qidirmoqda. The Sun manbalariga ko‘ra, nosozlik yuz bergan taqdirda reaktor portlamagan bo‘lardi, biroq ta’mirlash holati umuman suv osti kemasining ishonchliligi borasida savollar tug‘dirmoqda.
Britaniya qirollik dengiz flotida hozirda Vanguard sinfidagi to‘rtta suv osti kemasi bor. 2028-yildan boshlab ular Trident yadroviy raketalari bilan qurollangan Dreadnought sinfidagi to‘rtta suv osti kemasining yangi avlodi bilan almashtiriladi. Vanguard suv osti kemasi 16 tagacha yadroviy raketalarni olib yurishi mumkin, ularning har biri sakkiztagacha Trident kallaklari bilan qurollangan.
