Oʻzbekistonda 2022-yilda uy-joy narxlari aholi daromadidan bir necha barobar yuqori darajada oʻsgan. Bu haqda Markaziy bank raisi Mamarizo Nurmurodov 26-yanvar kuni boʻlib oʻtgan matbuot anjumanida maʼlum qildi, deya xabar berdi “Daryo” muxbiri.
Mamarizo Nurmurodovning aytishicha, uy-joylar narxlari koʻtarilishiga bir necha omillar taʼsir oʻtkazgan.
“2022-yilda mehnat bozoridagi barqarorlik saqlab qolinishi, aholi daromadining nominal darajada 21 foiz, real darajada 9 foizga oʻsishi, traschegaraviy pul oʻtkazmalarining yuqori oʻsish surʼatlari uzoq muddat foydalaniladigan tovarlar va koʻchmas mulklarga boʻlgan talabning ortishiga olib keldi. Bu oʻz navbatida mazkur bozorlarda narxlarning oʻsishiga maʼlum jihatdan taʼsir qildi. Kuzatuvlarimizga koʻra, 2022-yilda ikkilamchi uy-joy bozoridagi narxlar 28 foiz atrofida, birlamchi bozorda 17 foiz atrofida oʻsdi”, – dedi Markaziy bank raisi.
Avvalroq Mamarizo Nurmurodov 2023-yilda kutilayotgan asosiy inflyatsion xatarlarni sanab bergandi. Xususan, aholi va tadbirkorlik subyekatlarining inflyatsion kutilmalari oshib borayotgani, bazaviy inflyatsiya darajasining yuqori koʻrsatkichlarda shakllanayotgani, budjet taqchilligining 4 foiz darajasida shakllanishi inflyatsion xatarlarni keltirib chiqarishi aytilgan.
“Shuningdek, taklif bilan bogʻliq inflyatsion xatarlar ham bor. Bunga toʻxtaladigan boʻlsak, metan gazi uzib qoʻyildi. Bu oʻz-oʻzidan benzin taqchilligini yuzaga keltirdi. Biz nima xatarni kutyapmiz, deganda, Markaziy bank ertaga gaz zapravkalari ochiladigan boʻlsa, gaz narxining koʻtarilib ketishi mumkin. Anomal sovuq kelgusi yilda kutilayotgan hosildorlikka salbiy taʼsir qilish ehtimoli bor. Bu holat narxlarga oshiruvchi bosim koʻrsatadi. Yana bitta masala, bizning isteʼmolimizda boʻlgan ayrim tovarlar ustuvor ravishda import bilan bogʻliq. Oʻshalarni bizga yetkazuvchi asosiy savdo hamkorlarimiz eksportiga maʼlum cheklovlar kiritilishi ham inflyatsiyaga taʼsir qiladi.
Keyingi xatar qurilish materiallari narxlariga borib taqaladi. Hozirgi tabiiy gaz uzilishlari qurilish materiallari taklifida tanqislik keltirib chiqarib, kelgusida bu mahsulotlar narxlari oshishiga olib kelishi mumkin. Pul oʻtkazmalari hajmining oʻsishi ham inflyatsiyaga bosim oʻtkazuvchi xatar hisoblanadi”, — degan Markaziy bank rahbari.
Izoh (1)
Bank raisini daromadlari oshgandir.