Toshkent viloyati Qibray tumanida 20 yoshli yigit ukasi va IIB xodimlariga pichoq bilan tahdid qildi. Viloyat Ichki ishlar bosh boshqarmasi axborot xizmati holat yuzasidan munosabat bildirdi.
Ma’lum bo‘lishicha, 26-yanvar kuni soat 20:00 da “Yangihayot” mahallasida yashovchi fuqaro shu hududda joylashgan IIB huquq-tartibot maskaniga borib, xonadonida janjal bo‘layotganini aytib, yordam so‘ragan.
Xabarga asosan, 2 nafar profilaktika inspektori fuqaro bilan birga uning uyiga yetib borgan. Xonadonda inspektorlar 19 va 20 yoshlardagi yigitlar urishib, bir-biriga pichoq bilan tahdid qilayotganiga guvoh bo‘lgan. Ajratmoqchi bo‘lganida, ulardan biri inspektorlarga ham qo‘lidagi pichoq bilan tahdid qilgani atrofdagi kuzatuv kamerasiga tushib qolgan.
Profilaktika inspektorlari ushbu shaxslarni xavfsizlantirgach, hududiy huquq-tartibot maskaniga olib kelgan. Holat yuzasidan hujjatlarni rasmiylashtirish vaqtida fuqaro yana janjalni davom ettirib, inspektorning xizmat xonasida bo‘lgan qaychini qo‘liga olgan va xodimlarga o‘qtalib, yengil tan jarohati yetkazgan.
U harakatlarini davom ettirgach, xodimlar xavfsizlikni ta’minlash maqsadida qo‘lidagi tig‘li jismi olib, unga kishan taqib qo‘ygan. Oradan bir oz vaqt o‘tgach, ushbu fuqaroda tutqanoq kasalligi qo‘zg‘ab, o‘zini noodatiy tuta boshlagan. Ayni shu vaqtda uning oila a’zolari qidirib, huquq-tartibot maskaniga kirib kelgan.
IIBBning qo‘shimcha qilishicha, ular voqeani videoga olib, go‘yoki IIB xodimlari fuqaroni kaltaklab, shu ko‘yga soldi mazmunida izohlagan. Lekin mazkur jarayonda xodimlar tomonidan fuqarolarga nisbatan kuch ishlatilmagan. Hozirda holat yuzasidan qonuniylikni ta’minlash maqsadida tuman prokuraturasi tomonidan tergovga qadar tekshiruv harakatlari olib borilmoqda.
Izoh (0)