“Prava”ni yangisiga almashtirib beradigan onlayn xizmat faoliyatida nosozlik kuzatilmoqda

O‘zbekistonda 30-yanvardan boshlab Yagona interaktiv davlat xizmatlari portali orqali eski namunadagi haydovchilik guvohnomasini onlayn almashtirish imkoniyati yaratilgani haqida xabar berilgandi. O‘quvchilar “Daryo”ga murojaat qilib, ushbu xizmatni ko‘rsatishda kamchiliklar yuzaga kelayotganini ma’lum qildi.

Murojaatlarda aytilishicha, “prava”ni yangisiga almashtirish uchun ariza berish jarayonining uchinchi bosqichi, ya’ni fuqaroning eski haydovchilik guvohnomasi ma’lumotlari aks etuvchi oyna ochilmayapti.

Ixtiyoriy “Daryo” xodimlarida ushbu xizmat turi tekshirilganda bir nafarining sahifasida rostdan ham ma’lumotlar yuklangani yo‘q. 

“Daryo” muxbiri holat yuzasidan munosabat olish maqsadida Adliya vazirligi matbuot xizmati rahbari bilan bog‘landi. Sevara O‘rinboyeva bunday vaziyatda Ichki ishlar vazirligiga murojaat qilish kerakligini, chunki baza ularda ekanini aytdi.

So‘ng IIV Yo‘l harakati xavfsizligi xizmati matbuot xizmati boshlig‘i Aziz Murodov bilan bog‘landik. U esa Adliya vazirligiga murojaat qilish kerakligini aytdi.

“E’lonni Davlat xizmatlari markazi bergan. Men ma’lumotlarni qayerdan olishlariga qiziqqanimda pasport bazasidan olishayotganini bildim”, — dedi Aziz Murodov.

YHXX axborot xizmati boshlig‘i holatni aniqlashtirib, so‘ng aloqaga chiqishini bildirdi, ammo hech qanday tushuntirish berilmadi.

Aslida YIDXPdagi bir xizmat turining me’yor darajasida ishlamayotgani, faoliyatida nosozliklar kuzatilayotganiga kim javobgar?