“Daryo” nashri 30-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi
Eronga nisbatan davomli zarbalarni qaysi davlat yollamoqda?
Suriyada 25 ta yuk mashinasidan iborat karvon aviazarbaga uchradi. Al-Arabia telekanalining xabar berishicha, yuk mashinalari Erondan kelayotgan bo‘lgan, ular Eron Islom inqilobi posbonlari korpusi tomonidan qo‘llab-quvvatlanadigan guruhlarga qurol-yarog‘ olib ketayotgani taxmin qilingan.
Jurnalistlardagi ma’lumotlarga ko‘ra, dronlar zarbasi Suriyaning Al-Bukamale shahridagi tuman yaqinida “Hizbulloh” nazorat qiladigan norasmiy chegara punktiga berilgan va u oltita yuk mashinasini vayron qilgan.
Hozircha hech kim hujum uchun javobgarlikni o‘z zimmasiga olmadi. Suriyalik inson huquqlari faollari: uchuvchisiz uchar apparatlar AQSH boshchiligidagi xalqaro koalitsiyaga tegishli bo‘lishi mumkinligini ta’kidlamoqda.
Eslatib o‘tamiz, 29-yanvar kuni Erondagi strategik obyektlarda qator portlashlar sodir bo‘lgandi. OAV xabarlariga ko‘ra, hujum ortida Isroil va AQSH turgan bo‘lishi mumkin.
Mazkur vaziyatda Pentagon matbuot kotibi Patrik Rayder: Erondagi obyektlarga berilgan zarbalarda AQSH harbiylarining hech qanday aloqasi yo‘qligini ma’lum qildi.
Reuters’ga agentligining ismi oshkor etilmagan rasmiylarga tayanib yozishicha, AQSH bo‘lib o‘tgan voqeada Isroilni ayblamoqda.
Rossiya Boltiqbo‘yi mamlakatlari va yoki Polshaga qarshi hujum boshlagan taqdirda NATO bilan yuzma-yuz keladi
Ukraina tashqi razvedkasining sobiq rahbari, armiya generali Nikolay Malomujga tayanib, UNIAN xabar berishicha: Ukrainada Rossiya va NATO o‘rtasidagi ehtimoliy to‘g‘ridan-to‘g‘ri to‘qnashuv ssenariysi ishlab chiqilmayapti.
“Agar juda samarali operasiya tayyorlanganda, urush tezda tugashi mumkin edi,- generalning ta‘kidlashicha Rossiya NATO birlashgan kuchlari salohiyatining o‘ndan bir qismiga ham ega emas.
Uning fikricha, agar NATO urushga kirishsa, Rossiya yadroviy strategik hujum qurollarini joylashtirishga harakat qilardi. Dunyo esa global inqiroz va butun insoniyatni yo‘q qilish xavfi yoqasida bo‘lardi.
“Bayden va boshqa dunyo yetakchilari bu chiziqni juda aniq his qilmoqda. Shuning uchun global hujum bo‘lmaydi va hozirda bunday ssenariy ishlab chiqilmayapti.
Agar Rossiya NATO davlatlaridan biriga — Boltiqbo‘yi mamlakatlari, Polshaga qarshi hujum boshlagan taqdirda NATOning armiyasi Rossiya bilan yuzma-yuz keladi. Bu jarayonda NATO Ukrainani qo‘llab-quvvatlash uchun emas, balki Rossiya agressiyasiga javoban urushga kiradi”, — deydi general.
Ukraina bahorda G’arb tanklaridan foydalana boshlaydi,2023-yil oxirida esa Abrams M1A2 tanklari yetkazilishi rejada
Ukraina Qurolli kuchlari G‘arb beradigan tanklardan bahordayoq foydalanishni boshlashi mumkin, dedi mamlakat mudofaa vaziri Aleksiy Reznikov CBC telekanaliga bergan intervyusida.
Vazirning so‘zlariga ko‘ra: Gʻarb va’da qilgan tanklar bilan Ukraina Qurolli kuchlarida kamida ikkita tank batalyonlari tashkil etiladi va ulardan qarshi hujumni davom ettirish uchun foydalaniladi.
Mudofaa vaziri G‘arb davlatlari Ukrainaga tank yetkazib berishda davom etishiga ishonch bildirdi.
Keyinroq The Washington Post nashri Jo Bayden va’da qilgan 31 ta Abrams M1A2 tanklari Ukrainaga 2023-yilning oxirida yetkazib berilishi mumkinligi haqida xabar berdi. Nashr maqolasida aytilishicha, tanklar AQSH harbiy zaxiralaridan olib berilmaydi, balki Ukraina xavfsizligini ta’minlash tashabbusi doirasida sotib olinadi.
Nukusdagi ko‘p qavatli uyda gaz portladi va qutqaruv jarayonida qurbonlar soni ko‘paydi, holat yuzasidan jinoyat ishi qo‘zg‘atildi
Nukusdagi ko‘p qavatli uyda 29-yanvar kuni gaz portlashi oqibatida besh kishi halok bo‘lgandi. Qoraqalpog‘iston prokuraturasi holat yuzasidan jinoyat ishi qo‘zg‘atilganini ma’lum qildi.
Shaharning “Temir jol” mahallasida joylashgan 4 qavatli uyda gaz-havo aralashmasining chaqnashi tufayli portlash sodir boʻlib, uydagi bir nechta xonadonlarning tom va pol qismlari oʻpirilib, 4-qavatdan 1-qavatgacha tushib ketgan.
30-yanvar kuni soat 02:30 larda FVV qutqaruvchilari tomonidan turli darajadagi jarohatlar bilan vayronalar ostida qolib ketgan 5 yoshli qizaloq chiqarib olingan va tibbiy yordam ko‘rsatish uchun shifoxonaga yuborilgan. Oradan 30 daqiqa o‘tib bino konstruksiyalari orasidan bir nafar fuqaroning jasadi topilgan.
Erta tongga kelib, vayronalar ostidan yana to‘rt nafar fuqaroning jasadi topilib, jami halok bo‘lganlar 5 nafarga yetdi.
Mazkur holat yuzasidan Jinoyat kodeksining 259-moddasi 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda. Hozirda aybdor shaxslar doirasini aniqlash, ularni jinoiy javobgarlikka tortish masalasi hal etilmoqda.
Izoh (0)