Novak Jokovich Australian Open’ning 10 karra g‘olibiga aylandi. Serbiyalik tennischi sovrinlari soni bo‘yicha Nadalni ortda qoldirdi

Avstraliyaning Melburn shahrida erkaklar o‘rtasida Australian Open musobaqasining finali 29-yanvar, yakshanba kuni o‘tkazildi.

Hal qiluvchi bahsda serbiyalik Novak Jokovich Gretsiya vakili Stefanos Sisipas bilan bahs olib bordi. Uch set davom etgan bahsda Jokovich 6:3, 7:6, 7:6 hisoblarida g‘alaba qozondi.

Shu tariqa Jokovich Australian Open’ning 10 karra g‘olibiga aylandi. Bu serbiyalik faoliyatidagi “Ulkan toj” turkumiga kiruvchi 22-sovrin bo‘ldi. Novak yetti marta Uimbldon, uch marta US Open va ikki bor Rolan Garrosda zafar quchgan.

Jokovich faoliyatidagi 93-sovrinni qo‘lga kiritdi va bu borada Rafael Nadalni ortda qoldirdi. Faqat Ivan Lendl (94), Rojer Federer (103) va Jimmi Konnors (109) bu borada Jokovichdan oldinda.

Qayd etish kerak, Jokovich 2022-yilgi Australian Open turnirini vaksinatsiyadan o‘tmagani bois o‘tkazib yuborgandi.

Australian Open

Final

29-yanvar, yakshanba

Novak Jokovich (Serbiya) — Stefanos Sisipas (Gretsiya) 6:3|7:6|7:6