“YouTube’dagi obunachilarimiz soni MDH mamlakatlari IIV kanallarinikidan ham ko‘p” — Shohrux G‘iyosov IIVning mediamakondagi faoliyati haqida gapirdi
“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 16-soni mavzusi “Ichki ishlarning ichki ishlari” bo‘lib, dastur mehmoni sifatida IIV matbuot kotibi Shohrux G‘iyosov taklif etildi.
— IIV matbuot xizmatiga 2019-yil noyabr oyida keldim. Ishni tashkil qilish masalasi internet va ijtimoiy tarmoqlardan boshlandi, veb-resurslar bilan ishlash bo‘limini tashkil qilib, navbatchilik tashkil qildik: uchta xodim bir sutka davomida butun internet makonini monitoring qiladi, ikki sutka dam oladi. Bu bizning katta yutuqlarimizdan biri bo‘ldi. Jamoatchilikning e’tibori ko‘p bo‘lgan ijtimoiy tarmoqlarda o‘z sahifamizni ochdik. Vazirlik rasmiy saytini qayta tashkil qildik. Ichki ishlar vazirligi aholi uchun 47 ta yo‘nalishda xizmat ko‘rsatadi, shundan 24 tasi hozir onlayn tartibda, saytimizda berib boriladi. O‘tgan yili saytdan 1 mln 600 dan ortiq fuqaro foydalangan. Taqqoslash uchun, 2019-yilgacha bu ko‘rsatkich 50 mingta ham bo‘lmasdi.
Yana bir yutug‘imiz, notijorat davlat organlari orasida bizning sayt odam soni bo‘yicha milliy qidiruv tizimida birinchi uchlikdan (SSV hamda Mehnat vazirligi bilan) tushmay keladi. Bundan tashqari, yangiliklarga birinchi manba bo‘lish maqsadida saytimizda kuniga 20 tagacha ma’lumot qo‘yib boriladi. Umumiy viloyatlarni hisobga olganda, sohaviy xizmatlar bilan 22 ta saytimiz bor, hammasini olib qarasak, ichki ishlar organlari faoliyati bo‘yicha kuniga 70 dan ortiq ma’lumot beriladi.
Telegram’da Ichki ishlar vazirligining 17 ta, barcha viloyatlarni ham hisobga olganda 39 ta rasmiy sahifasi mavjud bo‘lsa, umumiy obunachilar soni 500 mingdan ziyod. Shuningdek, YouTube platformasiga ham katta e’tibor qaratyapmiz, bu tarmoqda 205 mingdan ortiq obunachimiz bor. Bu ko‘rsatkich hattoki MDH davlatlari Ichki ishlar vazirliklarining YouTube kanallaridagidan ham ko‘p. Bu yutuqlarning barchasi kerakli, qiziq kontent qo‘yib borganimizdan.
Media markazimiz tomonidan 10 ta turkum koʻrsatuvlar tayyorlanadi. Yoshlar, bog‘cha bolalari uchun ham mo‘ljallangan “Mitti mayor” nomli dasturimiz ham bor. Har oyda bir marta ichki ishlar organlari sohasini to‘liq yoritib beradigan “Bugungi rakurs” nomli ko‘rsatuvimiz ham bor. Bundan tashqari, haftalik dayjest ham tayyorlaymiz.
Ijtimoiy tarmoqlardan tashqari, televideniyega ham katta e’tibor beramiz. MTRK hamda nodavlat telekanallar bilan memorandum tuzib, 13 ta davriy — haftalik va kunlik ko‘rsatuvlar tayyorlaymiz. Radioga ham eshittirishlar tayyorlab beramiz, shu paytgacha 5,5 mingdan ortiq eshittirish bergan ekanmiz. Shuningdek, vazirlik radiokanalini tuzish rejasi ham bor, bu, albatta, mablagʻga bogʻliq boʻlgani uchun toʻxtab turibdi.
Gazeta-jurnallarda ham, oʻtgan yil hisobida 9 mingga yaqin maqola berganmiz. Oʻz nashrlarimizdan “Postda”, “Qalqon” gazetalari 50 ming nusxada, jurnallarimiz 19 ming adadda chiqadi. Faqat materiallar tayyorlab efirga berishdan tashqari, jonli muloqot ham qilamiz, — deydi Ichki ishlar vazirligi matbuot kotibi.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
