“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 16-soni mavzusi “Ichki ishlarning ichki ishlari” bo‘lib, dastur mehmoni sifatida IIV matbuot kotibi Shohrux G‘iyosov taklif etildi.
— Menga doim xodimlarning yonini olasiz, deb aytishadi. Mening o‘zim ham, turmush o‘rtog‘im ham xodim. Shuning uchun barcha xodimlar yuqori saviyali bo‘lishiga harakat qilaman. Ko‘p hollarda axborot noxolis tarqatiladi. Masalan, blogerlar sahifasidagi ayrim videolarda ko‘rasiz: xodim yugurib borib bir odamni urib yiqityapti-da, ostida xodim fuqaroni uryapti, deb izoh yoziladi. Lekin biladigan odam ko‘rsa anglaydiki, bu aslida kuch ishlatish orqali qo‘lga olish bo‘lib chiqadi. Videoning to‘liqroq qismini olib qarasak, xodim sudning majburiy ijrosini ta’minlash uchun fuqaroni olib ketmoqchi, lekin u bo‘ysunmayapti, janjal ko‘tarib, baqir-chaqir qilib qochib ketyapti. Xodim avvaliga uni ogohlantiryapti, fuqaro qonun talabini bajarmaganidan so‘nggina kuch ishlatyapti. Bu — qonuniy faoliyat. Shunday xodimlarning yonini olish kerak.
Xodimni kuch ishlatdi, urdi deb shunaqa holatda videoga olishadi. Lekin tasavvur qiling, u 8 soat ko‘chada turibdi, har xil odamlar bilan gaplashadi, asabiylashadi. Jurnalistlar kamera qarshisida bemalol gaplasha olar, lekin ichki ishlar xodimlari o‘zini noqulay his qiladi, hayajonlanadi, shu paytda to‘g‘ri kelmaydigan gap aytib qo‘yishi mumkin. Tasvirga olib ijtimoiy tarmoqlarga joylab yuborishadi. Xodimning ham oilasi, tanish-bilishi bor, noqulay bo‘lishi tabiiy. Albatta, bunday xodimlarning tarafini olishimiz kerak.
O‘tgan yil davomida ichki ishlar xodimlari bilan bog‘liq bo‘lgan 644 ta salbiy video tarqalgan. Shunaqa videolarni ko‘rib, xizmat tekshiruvi o‘tkazamiz, munosabat berish-bermasligimizdan qat’i nazar, har bir holatga reaksiya bildiramiz. Doim ham xodimlarning yonini olmaymiz, agar aybdor bo‘lsa, jazolaymiz.
Bir tomondan, tarqalayotgan videolar bizga yordam, chunki xodimning biz bexabar qolgan xatolarini ijtimoiy tarmoqlar ko‘rsatib beradi. Buning oqibatida, o‘tgan yili aynan ijtimoiy tarmoqlarda chiqqan ma’lumotlar bo‘yicha 139 ta xizmat tekshiruvi tayinlangan. Shu holatlarda 45 nafar xodimni intizomiy jazolaganmiz, ulardan 13 nafari egallab turgan lavozimidan ozod etilgan, bir nafari umuman ichki ishlar organlaridan bo‘shatilgan. 75 ta holatda xodimlar aybsiz deb topilgan. Shu bilan birga, ijtimoiy tarmoqlardagi axborotlar bo‘yicha 277 ta holatda xodimlar rag‘batlantirilgan, — ta’kidladi Shohrux G‘iyosov.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)