“Guruhlarda hazil yoki kinoya qilib aytgan gaplarimni ham chiqarib yuboradigan jurnalistlar bor” — Shohrux G‘iyosov
“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 16-soni mavzusi “Ichki ishlarning ichki ishlari” bo‘lib, dastur mehmoni sifatida IIV matbuot kotibi Shohrux Gʻiyosov taklif etildi.
— Ichki ishlar organlari inson huquqlari, ularning shaʼni, qadr-qimmati va maxfiy maʼlumotlar bilan ish olib boradi. Maʼlumotni jamoatchilikka berayotganimizda doim shov-shuv tugʻdirmaslik, tergov faoliyatiga xalaqit berib qoʻymaslik yoki buzib talqin qilinadigan maʼlumotlarni uzatmaslik uchun qaysi hajmda berish mumkin, degan muammo tugʻiladi. Tergov, jinoyat qidiruv yoʻnalishi yoki koʻchada sodir boʻlgan biror hodisa boʻyicha savollar koʻp boʻladi. Matbuot kotibi hamma narsani bilmaydi, biz joylarga chiqib batafsil soʻrab olamiz. Olgan maʼlumotimizni koʻrib chiqqandan keyin, jamoatchilikka eʼlon qilamiz.
Koʻpincha bir inson huquqini taʼminlash uchun boshqa fuqaroning huquqlarini cheklashga majbur boʻlamiz. Shunday hollarda huquqiy baho berilishini kutishga majburmiz. Haqiqatan nima holat boʻlgan, kim aybdor (albatta, bunga sud baho beradi), birlamchi maʼlumotni ham iloji boricha xolis berishga harakat qilamiz. Shunaqa paytlarda biz maʼlumot berolmasligimiz yoki kutib turishimiz mumkin. Bu esa oʻsha maʼlumotning tarqab ketishiga, shov-shuv, mish-mishlar kelib chiqishiga sabab boʻladi. Bu ogʻriqli masala.
Men doim jurnalistlarga oddiy odam sifatida tushuntirishga: oʻzi holat bunaqa, lekin biz jamoatchilikka shundayligicha berolmaymiz, biroz sabr qilsangiz, holatni tushuntirib berishim mumkin, deb ochiq, samimiy muloqot qilishga urinaman. Buni koʻpchilik tushunadi, ayrimlar tushunmasligi mumkin. Baʼzi hollarda Telegramʼdagi jurnalistlar guruhlarida yozishib turamiz, ularga tushuntirishga harakat qilaman, lekin men aytgan gapni olib chiqarib yuboraverishadi. Biror holatda hazil, kinoya qilib yozasiz, uni ham chiqarib yuborishadi. Shundan keyin qatiqni ham puflab ichadigan boʻlib qolganman, — deydi Shohrux Gʻiyosov.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
