“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 16-soni mavzusi “Ichki ishlarning ichki ishlari” bo‘lib, dastur mehmoni sifatida IIV matbuot kotibi Shohrux G‘iyosov taklif etildi.
— Film va seriallar juda muhim targ‘ibot yo‘nalishi hisoblanadi. Matbuot xizmatiga kelishimdan avval televideniyeda IIO bilan bog‘liq serial yoki kinolar ko‘rsam, bularning konsultanti yo‘qmi, deb hayron qolardim. Haqiqiy ichki ishlar xodimi o‘zini bunday tutmaydi yoki bunaqa tarzda gapirmaydi, derdim. Keyin Kinematografiya agentligi va boshqa xususiy kompaniyalar bilan memorandum tuzdik. Mana, 2 yil boʻldi, “Patrul” serialini yoʻlga qoʻydik, bundan tashqari, “Izquvar” nomli serialimiz ham bor.
Kinematografiya agentligi bilan film ijodkorlarining orasida ham tashkiliy, moliyaviy muammolar bor ekan. Ular shaxsiy tarkibni tashkil qilish, IIOga taalluqli transport vositalari bilan taʼminlab berish, jangovar sahnalar uchun maxsus kuch xizmatlari yoki YTHga uchragan mashinalarni yetkazib berish borasida bizdan yordam soʻrashdi.
Toʻraxoʻjayev Sayfiddin ismli 23 yillik stajga ega xodimimiz bor, veb-resurslar boʻyicha boʻlim boshligʻi lavozimida ishlaydi. Aynan kinematografiya boʻyicha uni konsultant qilib belgilab qoʻydik. Kinochilar bizga ssenariy berishadi, u oʻrganib chiqib, kerak boʻlsa, tasvirga olish jarayonida ham qatnashadi, texnik va tashkiliy masalalarga yordam beradi. Aktyorlarni saralash jarayonida ham qatnashadi, film hayotiy chiqishi uchun rol ijrochisi aytadigan gaplari, oʻzini tutishi borasida maslahat beradi.
Ayrim tashkilotchilar bizga aytishadi: “Agar ichki ishlar xodimini yomon qilib koʻrsatsak, bu kino tasdiqdan oʻtmaydi”, — deb. Yoʻq, bu hayot-ku, xodimlar orasida poraxoʻrlari, gʻarazlilari, muhitni buzadiganlari bor, shularni ham hayotiy qilib koʻrsatib berishimiz kerak. Mana hozir 15 tacha ssenariy ustida ishlanyapti, — deya maʼlum qildi ichki ishlar vazirligi matbuot kotibi.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)