Bizga kino shunchalik yoqadiki, uni tomosha qilganimizdan keyin bir necha kun hayratda qolgandek yuramiz. Ammo filmdagi dunyo qanchalik maftunkor bo‘lmasin, ba’zan ssenariy mualliflarining qo‘pol xatolarini sezmaslikning iloji yo‘q.
Qahramon to‘satdan qandaydir mahoratga ega bo‘ladi
“Uenzdey” serialining bosh qahramoni ijtimoiy tarmoqlardan foydalanmasligini, dugonasiga shahar telefonidan qo‘ng‘iroq qilishini va hatto yozuv mashinkasida yozishini aytadi. Ammo birinchi mavsum oxirida qiz sovg‘a sifatida uyali telefon oladi va undan bemalol foydalanadi.
Mayli, deylik, u zamonaviy telefonlardan foydalanishni biladi, shunchaki ularni yoqtirmaydi. Ammo shunga qaramay, avvaliga texnikani o‘rganish kerak. Uenzdey esa telefondagi xabarlarni har kuni gadjetdan foydalanadigandek ko‘zdan kechiradi.
Havo ventilyatsiyasi har doim toza bo‘ladi
Triller va jangovar filmlar qahramonlari ko‘pincha havo ventilyatsiyasidan o‘tishlari kerak. Ko‘pincha bu bo‘shliqlar juda tor bo‘ladi, personajlar ularga zo‘rg‘a sig‘adi. “Juda g‘alati ishlar”da bolalar ventilyatsiyaga qulay joylashadi, lekin ular ulkan parrakni o‘chirishlari kerak. Bu holat ancha real ko‘rinishi mumkin, shunga qaramay, kino ijodkorlari ba’zi detallarni hisobga olishmaydi: ventilyatsiyaning devor va pollari suratga olishdan oldin atayin yuvilgandek top-toza bo‘ladi.
Antagonist, albatta, qutulib bo‘lmaydigan qamoqxonadan qochadi
Buni “Qoʻzilar sukunati”da ham, “Kung-fu panda”da ham koʻrgansiz — yovuz odam qoʻli va oyogʻi zanjirband holda qamoqxonada oʻtiradi, lekin oxir-oqibat u qochib ketadi. “Uenzdey”da ham antagonistning taqdiri xuddi shunday bo‘ladi — na zanjirlar, na trankvilizatorlar yovuz odamni ushlab turolmadi.
Jangari film qahramonlari bejirim soch turmagi va makiyajda yurishadi
Bosh qahramonlarning soch turmagi va makiyaji, nima bo‘lishidan qat'i nazar, ajoyib ko‘rinadi. Natasha Romanoff ham yuguradi, terlaydi, yiqiladi, iflos polga dumalaydi, lekin soch turmagi va pardozi buzilmaydi.
Maxfiy agent va josus ayollar doim poshnali tuflida yuradi
Jangchi qizlarning yoyilgan sochlari ham mayli, ammo liboslar bo‘yicha dizaynerlar qahramonlarni poshnada ko‘rishni yaxshi ko‘radilar, shekilli, bunga misol “Charli farishtalari” filmi.
Sayohatchilar yangi kiyimlarni qayerdan olisharkan?
“Sargardonlar” dramasi murakkab sujet va personajlari bilan yaxshi tanish. Ammo tomoshabinlar bir narsadan hayron bo‘lishadi: qahramon bunday chiroyli kiyimlarni qayerdan oladi? Uning qo‘lida faqat yelpig‘ich bor, xizmatkori esa faqat jangovar qamchi olib yuradi. Biroq deyarli har bir seriyada personajning kiyimi o‘zgaradi. Uni ekrandan tashqarida kiyim-kechakka to‘la zambil ko‘targan xizmatkorlar kuzatib borishsa kerak.
Qahramonlar tishlarini tish pastasisiz yuvadi
“Qattiqqo‘l xonim” filmi Enn Xeteueyning yangi kunga tayyorlanishi bilan boshlanadi. U tishlarini qanday yuvishini suratda ko‘rish mumkin. Ko‘pik qani? Aftidan, kinoijodkorlar kundalik odatni xunuk deb hisoblashadi, shuning uchun filmlarda ko‘pikni ko‘rmaymiz.
Izoh (0)