“Oʻzbekneftgaz”: “Ishchi guruh” tomonidan Ustyurt regionida gaz qazib chiqarish va zaxira hajmini oshirish borasida bajarilayotgan ishlar holati oʻrganilmoqda
Oʻzbekiston Respublikasi prezidenti Shavkat Mirziyoyev huzurida oʻtkazilgan qish mavsumida aholini energiya resurslari bilan uzluksiz taʼminlash boʻyicha koʻrilayotgan choralar yuzasidan kengaytirilgan yigʻilishida qoʻyilgan vazifalar, shuningdek Prezident Administratsiyasi rahbari boshchiligida energetika sohasida yuzaga kelgan vaziyatni barqarorlashtirish yuzasidan oʻtkazilgan yigʻilishda berilgan topshiriqlar ijrosini taʼminlash maqsadida, “Oʻzbekneftgaz” AJ Boshqaruvi raisi Mehriddin Abdullayev boshchiligidagi “Ishchi guruh” aʼzolari tomonidan tabiiy gaz qazib chiqarishga amalga oshirilayotgan chora-tadbirlar oʻrganilmoqda.
“Oʻzbekneftegaz” AJ Boshqaruv raisi boshchiligidagi “Ishchi guruh” aʼzolari Ustyurt regionida boʻlib, anomal sovuq harorat davom etayotgan davrda boshqarmada 2023-yilda rejalashtirilgan geologik texnik tadbirlar ijrosi, xususan uglevodorodlar zaxiralarini koʻpaytirish, konlardan tabiiy gaz qazib chiqarishni oshirish hamda texnologik obyektlarni ishga tushirish boʻyicha amalga oshirilayotgan ishlar hamda joylarda mehnat qilayotgan ishchi-xodimlar uchun yaratilgan sharoitlar bilan tanishdi.
Nazorat ishlari Ustyurt regionida uglevodorodlar zaxirasini oʻstirish Dasturi doirasidagi ishlarni joyidan nazorat qilish maqsadida mavjud konlarning quyi qatlamlari istiqbolligini oʻrganish boʻyicha burgʻilanayotgan “Quyi Sharqiy Berdax” 5-sonli, “Quyi Shimoliy Berdax” 4-sonli izlov qidiruv quduqlaridagi burgʻilash jarayonlari holatini oʻrgandi.
Ustyurt gaz qazib chiqarish boshqarmasida konlardan gaz qazib chiqarishni oshirish yoʻnalishida burgʻilashdan ishga tushiriladigan “Sharqiy Berdax” 100-sonli, “Quyi Sharqiy Berdax” 11-sonli ishlatish quduqlarida burgʻilash boʻyicha olib borilayotgan ishlar joyidan nazorat qilindi.
Taʼkidlash kerakki, gaz qazib chiqarishning barqarorligini taʼminlashda quduqlarni kapital taʼmirlash ishlari ham muhim ahamiyatga ega va ushbu yoʻnalishdagi ishlar holatini oʻrganish uchun “Ishchi guruh” aʼzolari “Sharqiy Berdax” konidagi 32, 33 va 35-sonli quduqlarida boʻldi.
Shundan soʻng, “Sharqiy Arslon” istiqbolli maydonidagi 1-sonli izlov-qidiruv qudugʻini burgʻilash ishlari ham joyidan oʻrganildi. Oʻrganishlar davomida shu yerda faoliyat yuritayotgan ishchi-xodimlarning ish va yashash sharoitlari ham koʻrib chiqildi. Sovuq havo haroratini inobatga olingan holda zarur shart-sharoitlar yaratib berish boʻyicha tashkilot rahbarlariga topshiriqlar berildi.
Ish maydonlarida pudratchi tashkilotlar rahbarlari bilan mavjud muammoli masalalar muhokama qilinib, “Oʻzbekneftgaz” AJ departamentlari va Ustyurt boshqarmasi rahbarlariga har bir quduq kesimida amalga oshirilayotgan burgʻilash ishlariga masʼullarni biriktirish, ular tomonidan doimiy nazorat qilishni tashkil etish, zarur moddiy-texnik resurslarni yetkazib berish boʻyicha koʻrsatmalar berildi. Shuningdek, pudratchi tashkilotlar rahbarlarining quduqlarni oʻz vaqtida ishga tushirish boʻyicha masʼulligi taʼkidlab oʻtildi.
2023-yilda Ustyurt boshqarmasida geologik texnik tadbirlar doirasida jami 102 ta tadbirlar, bunda;
- 30 ta, shu jumladan 7 ta izlov-qidiruv quduqlarini burgʻilash;
- 67 ta quduqlarda kapital taʼmirlash va intensifikatsiya ishlarini amalga oshirish;
- 5 ta texnologik obyektlarni ishga tushirish, natijada 1,8 mlrd kub metr tabiiy gaz va 15,8 ming tonna suyuq uglevodorodlar qazib chiqarish rejalashtirilgan.
2023-yil yanvar oyining boshidan Ustyurt gaz qazib chiqarish boshqarmasi boʻyicha jami 3 ta shulardan 2 ta yangi, yaʼni “Quyi Surgil” 24 va 26-sonli quduqlar burgʻilash ishlaridan va yana 1 ta – “Sharqiy Berdax” 5-sonli qudugʻi kapital taʼmirlash ishlaridan soʻng ishga tushirilib, natijada kunlik tabiiy gaz qazib chiqarishni 850 ming kub metrga oshirishga erishildi.
“Oʻzbekneftgaz” AJ Matbuot xizmati
