“Bolang tug‘ilgach ikkovingga benzin quyib, yoqib yuboraman, deb tahdid qilgan” — Farg‘onada erining Matiz’ida o‘zini yoqib yuborgani aytilgan marhumaning yaqinlari

Ijtimoiy tarmoqlarda 2023-yilning 24-yanvar kuni Farg‘onada erkak homilador ayolini mashinaga solib, yoqib yuborgani haqida xabarlar tarqaldi. Favqulodda vaziyatlar boshqarmasi holat yuzasidan maʼlumot berib, Marg‘ilon ko‘chasida to‘xtab turgan oq rangli Matiz avtomashinasining saloni va motor qismi to‘liq yonganini bildirdi. Bosh prokuratura matbuot xizmati esa mashinani unda bo‘lgan ayol yoqib yuborganini qo‘shimcha qildi.

“Daryo” muxbiri bilan suhbatlashgan marhumaning yaqinlari ayol o‘zini yoqib yuborganiga ishonmasliklarini, qolaversa, holatga guvoh bo‘lganlar voqeadan avval Matiz haydovchisining qo‘lida benzinni ko‘rganini aytishganini taʼkidlamoqda.

Kechagi hodisadan bir kun oldin opam menga telefon qilib, turmush o‘rtog‘i o‘zgarib qolganini aytgandi. “Ha uni qo‘y, o‘zing eson-omon bolangni bag‘ringga ol”, degandim. “Bolang tug‘ilgandan keyin ikkovingning ustingdan benzin quyib, yoqib yuboraman, deb tahdid qilyapti”, degandi. O‘sha kuni opamning uyqusi kelmadi. Soat ikkigacha gaplashdik. “Unaqa odam bo‘lsa, umuman gaplashma, yurma, yashama”, dedim. Bu opamning ikkinchi turmushi edi. 10 yashar qizchasi bor. O‘sha paytda qizini uyiga tashlab chiqqan bo‘lgan. O‘zini yoqib yuboradigan holatda emasdi. U bolasini o‘ylardi, unaqa tushkunlikka tushmasdi. Kecha ham tushdan keyin soat uch yarimlarda keldi. Shu oxirgi marta ko‘rganim. Opam o‘zini yoqib yuboradigan darajada emasdi. Juda bosiq edi, — deydi marhumaning singlisi.

Masʼullarning qo‘shimcha qilishicha, 24-yanvar kuni soat taxminan 19:00 larda fuqaro M.U. Matiz boshqaruvida homilador turmush o‘rtog‘i (sharʼiy nikoh asosida) 1987-yilda tug‘ilgan M.X.ni shifoxonadan yashash xonadoniga olib ketayotgan vaqtida, turmush o‘rtog‘i uni rashk qilib, janjallashib qolgan. Er xotini bilan gaplashib olish maqsadida avtomashinani Farg‘ona shahridagi “Neftchi” stadioni ro‘parasida to‘xtatgan. Shu vaqtda avtomashina orqa o‘rindig‘ida o‘tirgan ayol o‘zi bilan uyidan olib chiqqan plastmassa idishdagi benzin yoqilg‘isini dastlab turmush o‘rtog‘iga, keyinchalik esa o‘ziga hamda avtomashina saloni ichiga sepib, yoqmoqchi bo‘lgan. Turmush o‘rtog‘ining ushbu harakatidan qo‘rqib ketgan erkak avtomashinadan tushib, tashqariga chiqib qochgan vaqtda ayol yondirgich (zajigalka) bilan o‘zini va avtomashinani yoqib yuborgan. Chaqiruvga asosan hodisa joyiga yetib kelgan Farg‘ona viloyati Favqulodda vaziyatlar boshqarmasi xodimlari tomonidan yong‘in tezkorlik bilan o‘chirilgan.

Marhumaning singlisi opasi yongan joyga borib, holatni surishtirganida hududdagi salon xodimi bilan gaplashganini, salon ishchisi voqea sodir bo‘lishidan avval Matiz haydovchisining qo‘lida benzin borligini ko‘rganini aytganini bildirdi.

Kecha yongan joyga ham bordik. O‘sha yerda salonda ishlovchi opa “bolaning qo‘lida baklajkada benzin bor edi”, dedi. Men benzin opamning qo‘lidamidi yoki u bolaning qo‘lidamidi, deb so‘radim. “Bolaning qo‘lida edi”, dedi. Salonchi opaning aytishicha, avval mashina tashqarisida mojaro bo‘lgan. Keyin mashinaga o‘tirishgan. So‘ngra u bola mashinadan tushib qochgan. Uni quvlaganlar ham bor ekan-da. Endi u bola yolg‘on ko‘rsatma berib, men eshikni ocholmay qoldim debdi. Bu gap yolg‘on-da. Opam mashinada o‘tirgan holida qolib ketgan. U opamga biror nima bergan, shekilli. Agar shunday bo‘lmaganda, u mashinadan tushib qolardi-yu. Opamning kuchi ko‘p edi. Qolaversa, opam o‘zini yoqvoradigan qiz emasdi, — deydi marhumaning singlisi.

Marhumaning onasi kuyovi qiziga sharʼiy nikoh asosida uylanib, Farg‘ona shahridagi ko‘p qavatli uylardan ijaraga xonadon olib berganini maʼlum qildi.

Qizimning birinchi turmushi bo‘lmagan. 10 yoshli qizchasi bor. Sharoitimiz yo‘qligi uchun 2022-yilning noyabr oyida u ijaraga kvartira olib chiqib ketgan edi. Shu orada “buva, turmushga chiqdim” degandi, jahl bilan qattiq gapirdim. “Nikohimiz bor, men ham qachongacha shunday yuraman, erim nomaʼqul chiqqan bo‘lsa, bu yaxshi bola ekan”, dedi. Baribir yaxshi ish qilmabsan, deb dakki berdim. Homilador edi. Mayli endi, ko‘ngli o‘ksimasin, dedim. Eplaysan, chaqqonsan, sog‘-salomat tug‘ib olgin, o‘zingga yordamchi bo‘lib qolar ekan, deb ko‘nglini ko‘tarib qo‘ydim. Orada kelib-ketib yurdi. Menga ko‘p gapirmasdi, bor dardini singillariga aytardi. Men bu muammolardan endi xabar topdim. Bilganimda, uni bu yo‘ldan qaytarishga, saqlab qolishga harakat qilardim. Qizim juda bosiq edi, o‘zini o‘zi eplardi, birovga muhtoj emasdi, yordam so‘ramasdi, qiynalgan taqdirda ham, o‘zi harakat qilardi. Ham chevarlik qilardi, ham bozorga chiqib, u-bu narsa sotardi. Qizimni o‘qitaman, shifokor qilaman, deb yurardi. Bahorga chiqib, uy sotib olmoqchi edi. Niyatlari ko‘p edi. O‘sha kuni soat to‘rtlarda chiqib ketgan ekan. Bilganimda qo‘yib yubormasdim, — deydi marhumaning onasi.

Tez tibbiy yordam bo‘limi xodimlari tomonidan avtomashina salonida bo‘lgan marhuma M.X.ning yong‘in natijasida tug‘ilgan o‘g‘il jinsli chaqalog‘i hayoti saqlab qolingan. Ammo bola uzoq yashamagan.

24-yanvar kuni soat 19:20 larda dispetcherimiz chaqiruv berdi. “Neftchi” stadionining yonida yong‘in bo‘layotganini aytdi. U yerga tezkorlik bilan yetib bordik. Borganimizda o‘t o‘chiruvchilar yong‘inni o‘chirishayotgan ekan. Mashina ichidan tutun chiqyapti, ular eshikni ochishga harakat qilyapti. Atrofdagilar mashina ichida homilador ayol bor deyishdi. Mashina eshigini ochishganidan keyin eʼtibor bersak, ayol yonib, kuyib ketgan holatda mashina ichida yotgan ekan. Chaqaloq bor, tirik ekan deyishdi. Chaqaloqni yordamchim ko‘tarib oldi. Men qaychi bilan uni onasidan ajratib, kindigini kesdim. Issiq matoga o‘rab, tezkorlik bilan yaqin atrofdagi tug‘uruqxonaga olib bordik, — deydi Farg‘ona shahar tez tibbiy yordam markazi shifokori Iqbol Abdullayev.

Farg‘ona shahar tibbiyot birlashmasi tug‘uruqxona bo‘limi shifokori Saida Muslimovaning aytishicha, shifokorlar tomonidan ko‘rsatilgan zarur tibbiy yordamga qaramasdan, chaqaloq shifoxonada vafot etgan.

24-yanvar kuni tungi navbatchilik paytimda Farg‘ona shahar tug‘uruq kompleksiga tez tibbiy yordam mashinasida chaqaloq olib kelindi. Chaqaloq yangi tug‘ilgan, og‘ir ahvolda edi. Dastlabki tekshiruvda yuz foiz kuygan tan jarohatlari oqibatida bemor kritik holatda ekanligi aniqlandi. Chaqaloq darhol reanimatsiya bo‘limiga olinib, unga yuqori malakali tibbiy yordam ko‘rsatildi. Afsuski, chaqaloq 3 soat-u 5 daqiqa yashadi. Muddatidan oldin tug‘ilgani va yuz foiz kuyish jarohati bilan olib kelingani uchun hayotini saqlab qolishning imkoni bo‘lmadi. Ish faoliyatimiz davomida bunday hodisaga birinchi marta duch keldik. O‘zimiz ham taajjublandik, hayratda qoldik. Judayam ayanchli holat edi, — deydi Saida Muslimova.

Mazkur holat yuzasidan Farg‘ona shahar prokuraturasi tomonidan Jinoyat kodeksining 103-moddasi 2-qismi “b” bandi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilib, dastlabki tergov harakatlari olib borilmoqda.