YUNESKO Ukrainaning Odessa shahri tarixiy markazini Jahon merosi ro‘yxatiga kiritdi. Shu tariqa YUNESKO “shaharning beqiyos umuminsoniy qadriyatini va uni himoya qilish butun insoniyat burchi” ekanini tan olmoqda.
“Urush davom etayotgan bir paytda, bu eʼtirof Odessani keyingi vayronagarchilikdan saqlab qolishga qaratilgan jamoaviy qatʼiyatimizni ifodalaydi”, — dedi YUNESKO bosh direktori Odri Azule shaharning Jahon merosi roʻyxatiga kiritilishini izohlab.
Umumjahon madaniy va tabiiy merosni muhofaza qilish to‘g‘risidagi konvensiya qoidalariga muvofiq, konvensiyani qabul qilgan barcha 194 davlat Jahon merosi obyektiga bevosita yoki bilvosita zarar yetkazishi mumkin boʻlgan qadamlarni qasddan qoʻymaslik va uni himoya qilishda hamkorlik qilish” majburiyatini zimmasiga oladi.
Bundan tashqari, Odessa tarixiy markazining Jahon merosi obyekti sifatida tan olinishi Ukrainaga shahar himoyasini ta’minlash uchun kengaytirilgan texnik va moliyaviy xalqaro yordam so‘rash huquqini beradi.
AFP xabariga ko‘ra, Tarixiy meros qo‘mitasining favqulodda yig‘ilishida shaharning arizasini 6 ta davlat qo‘llab-quvvatlagan, 14 davlat ovoz berishda betaraf qolgan, Rossiya qarshi ovoz bergan.
Odessani tegishli ro‘yxatga kiritish bo‘yicha xalqaro ekspertlar ishtirokidagi tayyorgarlik jarayoni Italiya va Gretsiya ko‘magida 2022-yil avgustda boshlangandi. Rasmiy arizani Ukraina prezidenti Vladimir Zelenskiy oktabr oyida topshirgan. Shaharni ro‘yxatga kiritish toʻgʻrisidagi qaror Ukraina hududida davom etayotgan urush munosabati bilan tezlashtirilgan tartib asosida qabul qilindi.
YUNESKOning Butunjahon merosi roʻyxatiga shuningdek, Kiyevdagi Avliyo Sofiya sobori, Kiyev-Pechersk lavrasi, Lvovning tarixiy markazi ansambli ham kiritilgan.
Izoh (0)