Rossiya prezidenti matbuot kotibi Dmitriy Peskov G‘arb davlatlari Ukrainaga texnikalar yetkazib berishiga munosabat bildirdi. Bu haqda “RBK” xabar berdi.

“Yevropa poytaxtlari va Vashingtondan Ukrainaga turli xil qurol tizimlari, jumladan, tanklar yuborilishi hech qanday holatda bu davlatlar yoki NATOning Ukrainadagi jangovar harakatlarga aralashishini anglatmaydi, degan bayonotlar eshitiladi. Biz bu fikrga mutlaqo qo‘shilmaymiz", — dedi Peskov.

Uning so‘zlariga ko‘ra, Moskva bunday harakatlarni “mojaroga bevosita aralashish” sifatida qabul qiladi.

“NATO ham, Yevropa davlatlari ham qilayotgan barcha ishlar toʻqnashuvga bevosita aloqadorlik sifatida qabul qilinmoqda, biz uning kuchayib borayotganini koʻrmoqdamiz”, dedi matbuot kotibi.

Peskov, shuningdek, Kreml Kiyevga tanklar yetkazib berilishi bilan bog‘liq “maxsus operatsiya” maqomini o‘zgartirish masalasini ko‘rib chiqmayotganiga ham aniqlik kiritdi.

“Bizning kun tartibimizda bunday mavzu yo‘q”, — deya xulosa qildi Kreml matbuot kotibi.

25-yanvar kuni Germaniya Ukrainaga Leopard 2 tanklarini jo‘natishga rozi bo‘ldi. Germaniya hukumati vakili Shteffen Hebestraytning so‘zlariga ko‘ra, Ukraina 14 ta Leopard 2 A6 tankini oladi. Germaniya boshqa mamlakatlardan tanklar Kiyevga berilishini ham ma’qullaydi. Bu qarordan so‘ng AQSH prezidenti Jo Bayden Ukrainaga 31 ta Abrams tankini yetkazib berishini ma’lum qildi.

Tanklarning yetkazib berilishi Rossiya rasmiylarining tanqidiga sabab bo‘ldi. Xususan, ushbu qaror fonida Qrimdan Davlat dumasi deputati Mixail Sheremet maxsus harbiy operatsiya maqomini o‘zgartirishni taklif qildi. Venadagi muzokaralardagi Rossiya delegatsiyasi rahbari Konstantin Gavrilovning qayd etishicha, tanklar yetkazib berish Moskvani Rossiya ”maxsus operatsiyasi” maqsadlaridan voz kechishga majburlamaydi, faqat chegaralarini kengaytiradi.