Krem, sous, biskvit va aksariyat taomlar uchun ko‘pincha faqat tuxumning oqi yoki sarig‘i kerak bo‘ladi. Tuxumning bir qismini boshqasidan ehtiyotkorlik bilan ajratish unchalik qiyin emas. Lifehacker nashri ularning bir nechtasi bilan bo‘lishdi.
Tuxum qobig‘ida
Ikkita idish tayyorlanadi: biri sarig‘i, ikkinchisi oqi uchun. Pichoq yoki sanchqi yordamida tuxum o‘rtasidan chaqiladi. Ulardan birida sarig‘i qolishi kerak. Barcha oq to‘kilmaguncha sariq qismni qobiqning yarmidan ikkinchisiga o‘tkaziladi. Ajratilgan sariq ikkinchi idishga solinadi. Ushbu jarayonda po‘choqdagi kirlar uning idishga tushmasligi uchun tuxumlarni yuvish tavsiya etiladi.
Qo‘llar bilan
Ushbu usulda tuxum idishga emas qo‘lga chaqiladi. Idish esa kaft ostida turadi. Barmoqlar orasidan tuxum oqi idishga tushadi, sarig‘i esa kaftda qoladi. Yoki tuxumni shunchaki idishga chaqib, qo‘llar bilan darhol sariqni olish mumkin. Faqat qo‘llar toza yoki qo‘lqop taqilgan bo‘lishi lozim.
Plastik butilka
Tuxum idishga chaqiladi. Toza bo‘sh plastik butilka tuxum sarig‘i ustiga keltiriladi. Avval baklashka biroz qisilib, sarig‘ini tortib olgach, so‘ngra qo‘yib yuboriladi. Natijada tuxum sarig‘i alohida ajralib chiqadi.
Voronka bilan
Agar oshxonada tor teshikli voronka bo‘lsa, u stakan ustiga qo‘yiladi va ichiga tuxum chaqiladi. Tuxum oqi pastga tushadi. Sarig‘i esa yuqorida saqlanib qoladi. Ushbu usul doim ham ish bermasligi mumkin, issiq havoda tuxum sarig‘i yoyilib, oqiga qo‘shilib oqib ketadi.
Elak bilan
Elak piyola ustiga qo‘yiladi. Elak ustidan tuxum chaqilib, elanadi. Natijada tuxum oqi pastdagi idishga oqib tushadi. Sarig‘ini osongina boshqa idishga ajratib olish mumkin.
Maxsus vosita yordamida
Agar muntazam ravishda tuxumlarning oqini sarig‘idan ajratish kerak bo‘lsa, mazkur vosita yordam beradi. Buning uchun ichki aylanani mo‘ljallab tuxumlarni chaqish kifoya. Vosita tuxum sarig‘ini ushlab qoladi va oqi pastga ajralib tushadi.
Mavzuga doir:
Izoh (0)