G‘arb harbiy amaldorlari Ukrainaga qiruvchi samolyotlar yetkazib berish masalasini muhokama qilmoqda, deb xabar berdi Politico gazetasi manbalarga tayanib. Muhokama Boltiqbo‘yi mamlakatlari ko‘magida Kiyev tashabbusi bilan boshlangan.
Politico nashriga ko‘ra, qiruvchilarni yetkazib berish bo‘yicha muhokama tanklar atrofidagi muhokamadan ko‘ra murakkabroq bo‘ladi. Yevropalik diplomatlarning nashrga aytishicha, hozir Yevropa mamlakatlarining Kiyevga qiruvchi samolyotlar berish haqidagi fikri ijobiy tomonga o‘zgargan. Shu bilan birga, Ukraina ittifoqchilari orasida bu harakat mojaroning yanada kuchayishiga olib kelishi mumkinligidan qo‘rquv saqlanib qolmoqda.
“Keyingi tabiiy qadam qiruvchi samolyotlar bo‘ladi”, — dedi Politico manbalaridan biri. Nashrning yana bir manbasi hozir qiruvchilarni yetkazib berishni “mutlaqo aqlga sig‘dirib bo‘lmaydigan” deb aytdi, biroq ikki-uch hafta ichida bu muhokamaga yana qaytish mumkinligini qo‘shimcha qildi.
Politico nashrining yozishicha, Oq uy Kiyevga hozirda qiruvchi samolyotlarni topshirish imkonsiz ekanini bildirgan. Nashr ta’kidlaganidek, ilgari AQSH hukumati HIMARS yoppasiga o‘t ochuvchi reaktiv tizimlari va jangovar tanklarni yetkazib berishdan ham bosh tortgandi, ammo oxir-oqibat bu qurollar Ukrainaga berildi.
25-yanvar kuni Germaniya va AQSH Ukrainaga Leopard 2 va Abrams og‘ir tanklarini yetkazib berishini rasman e’lon qildi, boshqa davlatlar ham og‘ir qurollar yetkazib berish rejalarini e’lon qildi. Shundan so‘ng Ukraina prezidenti Vladimir Zelenskiy Ukraina Qurolli kuchlariga samolyotlar, artilleriya va uzoq masofali raketalar ham zarurligini aytdi.
Niderlandiya va Slovakiya qiruvchi samolyotlarni yetkazib berishga tayyorligini bildirgan. O‘z navbatida, The Telegraph nashrining yozishicha, Buyuk Britaniya Mudofaa vazirligi qiruvchilarning o‘tkazilishi Rossiya—Ukraina urushining yanada kuchayishiga olib kelishidan xavotirda.
Izoh (0)