Boks afsonasi Mayk Tayson 90-yillarda jinsiy zo‘ravonlik qilganlikda ayblanmoqda
Boksning og‘ir vazn toifasi bo‘yicha sobiq chempioni Mayk Tayson o‘tgan asrning 90-yillari boshida Nyu-Yorkning Olbani shahrida sodir bo‘lgan jinsiy zo‘ravonlikda ayblanmoqda.
Suddan ismi sir bo‘lib qolishini so‘ragan ayol sobiq bokschi uni limuzinda zo‘rlagani va shundan so‘ng yillar davomida jismoniy va ruhiy qiynalib kelgani uchun 5 million dollar tovon talab qilmoqda. Ayolning ko‘rsatmasida zo‘ravonlikning aniq sanasi ko‘rsatilmagan va o‘sha paytda politsiyaga murojaat qilgan yo qilmagani ham noma‘lum.
Da’vo Nyu-York shtatidagi jinsiy zo‘ravonlik qurbonlari to‘g‘risidagi qonunga binoan qo‘zg‘atilgan bo‘lib, u jabrlanuvchilarga yillar, hatto o‘n yillar oldin sodir bo‘lgan zo‘ravonlik uchun da’vo arizalari topshirishga muhlat beradi.
56 yoshli Taysonning o‘zi ham, uning vakillari ham bu iddaolar va sudga da’vo arizasi kiritilgani bo‘yicha munosabat bildirmagan.
Jabrlanuvchining advokati Darren Seylbek sudga alohida hujjatda uning idorasi da’volarni tekshirganini va ularni “o‘ta ishonchli” deb topgani uchun matbuotga endi ish bo‘yicha izoh bera olmasligini ma’lum qilgan.
Eslatib o‘tamiz, Tayson 1992-yilning fevralida go‘zallik tanlovi ishtirokchisi Dezir Vashingtonga jinsiy zo‘ravonlik qilgani uchun 3 yil qamoqda o‘tirgan edi. Shuningdek, uning sobiq rafiqasi Robin Givens ajralish to‘g‘risidagi hujjatlarda Mayk asossiz tarzda tajovuz va zo‘ravonlik qilganini ko‘rsatib o‘tgandi.
2022-yilning yozida xuddi shunday ayblovlar boshqa bir mashhur amerikalik og‘ir vazn toifasi vakili Jorj Formanga ham qo‘yilgan edi. Ikki nafar ayol 74 yoshli bokschini o‘tgan asrning 70-yillarida ularga nisbatan jinsiy zo‘ravonlikda ayblagandi.
