2022-yilda Oʻzbekistonda kichik biznes va xususiy tadbirkorlik subyektlarining rahbarlari uchun eksport hamda xalqaro savdo qoidalarini oʻrgatuvchi yangi oʻquv dasturi joriy etilgandi. Kurslarda tadbirkorlar ham onlayn, ham oflayn shaklda bepul oʻqiydilar.
Ushbu oʻquv dasturidan koʻzlangan maqsad Oʻzbekistondagi kichik va oʻrta kompaniyalarga oʻz eksport salohiyatlarini yuzaga chiqarish uchun barcha imkoniyatlardan foydalanishda yordam berish va shu orqali milliy iqtisodiyot raqobatbardoshligining oʻsishiga uzoq muddatli ijobiy taʼsir koʻrsatishdan iborat. 2022-yil 21-sentyabrdan buyon oʻquv dasturi doirasida oʻzbekistonlik 500 dan ziyod tadbirkor tahsil oldi. Biznesmenlarga taklif etilayotgan kurslar qatorida eksport taomillari, xalqaro savdo qoidalari, tranzit logistika yoʻnalishlari, sifat va muvofiqlik standartlari, shuningdek yevropa Ittifoqi bozor talablari kabilar mavjud.
Oʻquv materiallari Xalqaro savdo markazi (ITC) – Jahon savdo tashkiloti va Birlashgan Millatlar Tashkilotining qoʻshma agentligi tomonidan ishlab chiqilgan. Ushbu tashabbus Yevropa Ittifoqi tomonidan moliyalashtiriladigan “Ready4Trade Markaziy Osiyo” loyihasining bir qismi sanaladi. Oʻzbekiston Respublikasi Investitsiyalar, sanoat va savdo vazirligi ushbu loyihaning faoliyatini muvofiqlashtirib, eksport hamda xalqaro savdo qoidalarini oʻrgatish tashabbusini qoʻllab-quvvatlaydi, zero eksportni kengaytirish Oʻzbekistonni iqtisodiy rivojlantirishdagi eng muhim ustuvorliklar sirasiga kiradi.
Oʻquv dasturi Toshkent davlat iqtisodiyot universiteti qoshidagi “Oʻzbekiston iqtisodiyoti rivojlanishining ilmiy asoslari va muammolari” ilmiy-tadqiqot markazi bazasida amalga oshiriladi. Universitet ushbu xalqaro loyihaning Oʻzbekistondagi institutsional hamkori boʻldi.
“Onlayn va oflayn kurslar ishtirokchilari noyob bilimlarga ega boʻladilar, chunki dastur Oʻzbekistonda eksportchilar duch keladigan muayyan muammolarga asoslangan. Xalqaro savdo markazining texnik ekspertizasi va keng professional kontaktlar tarmogʻi tufayli, tadbirkorlar oʻzlarini qiziqtirgan barcha savollarga oʻzlariga qulay shaklda, bepul javob olishlari mumkin”,- qayd etdi ilmiy-tadqiqot markazi direktori M.B Kalonov.
Oʻtgan yilda trenerlar Toshkentda, shuningdek Oʻzbekistonning bir qancha hududlari, jumladan, Fargʻona va Urganchda oflayn-seminarlar seriyasini oʻtkazdilar. Dasturni muvaffaqiyatli yakunlagach, ishtirokchilar kurs oʻtilganini onlayn tasdiqlovchi sertifikatlarga ega boʻldilar. 2023-yilda, poytaxtdan tashqari, Samarqand, Buxoro va Namanganda ham seminarlar oʻtkazish rejalashtirilgan. Joriy yilda instruktorlar rahbarligida birinchi seminar 30-yanvarda Toshkentda oʻtkaziladi. Oflayn seminarlarlarda qatnashish uchun quyidagi havola orqali roʻyxatdan oʻtish mumkin: https://bit.ly/3FDVAKQ
Taʼlim ikki shaklda – trenerlar rahbarligida oflayn seminarlarda va maxsus oʻquv platformasida onlayn rejimda oʻtishi sababli, har bir qiziqqan tadbirkor eksport asoslarini oʻziga eng qulay usulda oʻrganish imkoniyatiga ega boʻladi.
“Oʻzbekiston tadbirkorlari uchun yangi bozorlarga chiqish oʻz bizneslari koʻlamini kengaytirish va ishlab chiqarilayotgan mahsulot sifatini oshirish imkonini beradi. Bundan tashqari, kelgusida xorijda shuhrat qozonishi mumkin boʻlgan mahalliy brendlarni yaratish mamlakat obroʻsiga ham ijobiy taʼsir koʻrsatadi”, - qayd etdi TDIU professori Abdurashid Qodirov.
Oʻquv dasturida barcha qiziqqanlar tahsil olishlari mumkin, buning uchun UzExportAcademy platformasida roʻyxatdan oʻtish, kerakli kursni tanlash va taʼlim olishni boshlash, bu bilan eksportga chiqish yoʻlidagi ilk qadamni tashlash kifoya.
“Ready4Trade Markaziy Osiyo” – Yevropa Ittifoqi moliyalashtiradigan va Xalqaro savdo markazi tomonidan mahalliy sheriklar bilan yaqin hamkorlikda amalga oshiriladigan toʻrt yillik loyiha. Ready4Trade Markaziy Osiyo benefitsiarlari hukumatlar, kichik va oʻrta korxonalar, jumladan ayollar rahbarlik qiladigan korxonalar va biznes rivojini qoʻllab-quvvatlovchi tashkilotlar sanaladi.
Loyiha toʻgʻrisida batafsilroq maʼlumot: ready4trade.intracen.o...
“UzExportAcademy” oʻquv platformasi sayti: uzexport.learning-solu...
Reklama huquqi asosida
Izoh (0)