Bir necha millionlab dollarlik boylikning merosxo‘ri va Gollivudning eng ko‘p tanqidlarga uchragan yulduzlaridan biri bo‘lgan Peris Hilton uzoq vaqt davomida oila qurishga jur’at eta olmagan, deb yozadi Wday.
Peris 2020-yilda tadbirkor Karter Reum bilan birgalikda ko‘rinish berdi. 2021-yil fevral oyida ular unashtirilganini eʼlon qildi. Karter biznesmen, yuqori sifatli parfyumeriya seriyasining yaratuvchisi, tadbirkorlikka oid kitoblar muallifi. Aytgancha, u Peris bilan tengdosh.
Nikohdan oldin Peris hayotida birinchi marta farzand haqida o‘ylab ko‘rdi. “Karter men orzu qilgan inson, 100 foiz xuddi shunday. Biz har doim to‘yni rejalashtirish, bolalarimizga ism qo‘yish va boshqa narsalar haqida gaplashamiz. Shuning uchun men keyingi bosqichga o‘tishdan va nihoyat haqiqiy hayot kechirishdan juda xursandman. Hozirda men sun’iy urug‘lantirish jarayonidaman va umid qilamanki, tez orada homiladorlik haqida sizga xabar beraman”, — degan edi Peris.
Natijada yulduzning orzusi ushaldi. Surrogat ona yordamida ularning farzandi dunyoga keldi. Hamma narsa qat’iy ravishda sir tutildi. Ammo chaqaloq allaqachon tug‘ilib, yangi uyiga kelganida, Hilton bu yangilikni dunyo bilan baham ko‘rishga qaror qildi. U chaqaloqning qo‘lidan tutgan ta’sirchan suratni o‘z sahifasga joylashtirdi.
Minglab muxlislar va yaqinlari Perisni tabriklab, chaqaloq bilan birga unga ham sog‘liq tiladi. Ammo yulduzning o‘g‘li bilan tushgan ilk suratiga shubha bilan qaraganlar ham bo‘ldi.
“Barcha e’tibor bolaga emas, manikyurga — Peris o‘ziga sodiq”.
“U hatto fotoshop suratni ham joylashtirdi. Nega buni baham ko‘rish kerak?”
“Umid qilamanki, men adashyapman, lekin u yaxshi ona bo‘lishi dargumon. U o'ziga haddan tashqari e’tibor qaratgan. Hamma umid otadan”
Peris salbiy izohlarga e’tibor bermaydi. “Men har doim ona bo‘lishni xohlaganman va Karter bilan bir-birimizni topganimizdan juda xursandman, — deydi People jurnaliga. — Biz hayotning ushbu yangi bosqichini boshlaganimizdan juda baxtiyormiz va yuragimiz kichkintoyimizga bo‘lgan muhabbat bilan to‘lib toshgan”.
Hilton hozircha bolaning ismini oshkor qilmagan. Chaqaloqning o‘g‘il bola ekani ma’lum. Ammo u yana ko‘proq farzand ko‘rishni rejalashtirayotganini aytgan — kamida to‘rt yoki beshta. Muxlislar uchun uning namunali ko‘p bolali onaga aylanishini tomosha qilish qiziqarli bo‘lishi tabiiy. Agar, albatta, bu sodir bo‘lsa.
Mavzuga doir:
Izoh (0)