Oʻzbekiston Respublikasi Prezidenti Administratsiyasi va Vazirlar Mahkamasi topshiriqlariga asosan joriy yilda “Oʻzbekneftgaz” AJ tomonidan tabiiy gaz qazib chiqarish hajmini 32,8 mlrd kub metrga yetkazish topshirigʻi belgilandi.
Mazkur topshiriq ijrosini taʼminlash uchun, “Oʻzbekneftgaz” AJ Boshqaruvi raisi Mehriddin Abdullayev boshchiligida aksiyadorlik jamiyati tasarrufidagi uglevodorod konlarini samarali va maqsadli ishlatish, ulardan tabiiy gaz va suyuq uglevodorod xom ashyosi qazib chiqarishni oshirish hamda mavjud quduqlarning bir maromda ishlatilishini taʼminlash boʻyicha ishlar boshlab yuborildi.
Ushbu tadbirlar doirasida dunyoning yetakchi neft servis kompaniyasi “Schlumberger” bilan birganlikda jahon tajribasi asosida 2023-yil uchun umumiy qiymati 5,7 trln soʻmga teng boʻlgan 744 ta geologik-texnik chora-tadbirlarni oʻz ichiga olgan “Makro invest dastur” ishlab chiqildi.
Unga asosan jami 111 ta yangi quduqni burgʻilash, 608 ta quduqda kapital taʼmir hamda intensifikatsiya ishlari va 25 ta texnologik obyektni (siquv kompressor stansiyalari, gazni dastlabki tayyorlash qurilmalari, kichik kompressor qurilmalari, gaz yetkazib berish quvurlari) qurib ishga tushirish rejalashtirilgan.
Jumladan:
- Buxoro-Xiva va Fargʻona neftgazli mintaqalaridagi 4000 metrgacha boʻlgan chuqurliklarda joylashgan neogen, paleogen, boʻr va yura davri yotqiziqlaridan uglevodorod xomashyosini qazib olish uchun jami 83 ta yangi quduqlarni burgʻilash, 541 ta quduqlarda kapital taʼmirlash hamda intensifikatsiya ishlari va 20 ta texnologik obyektlar;
- Ustyurt neftgazli mintaqasidagi chuqur yura davri yotqiziqlarida joylashgan uglevodorod xomashyosini qazib olish uchun jami 28 ta yangi quduqlarni burgʻilash, 67 ta quduqlarda murakkab turdagi kapital taʼmirlash hamda intensifikatsiya ishlari va 5 ta texnologik obyektlar qurib ishga tushiriladi.
Konlarda gaz qazib chiqarish barqarorligini taʼminlash hamda gaz zaxiralarini maksimal darajada oʻzlashtirish maqsadida 10 ta siquv kompressor stansiyalarini qurib ishga tushirish (“Janubiy Tandircha”da konida katta kompressor va “Girsan”, “Chulquvur”, “Yangikazgan” konlarida kichik ustki kompressor stansiyalari hamda “Shoʻrtan” konida 6 ta obyektda kichik ustki kompressor stansiyalari) rejalashtirilgan.
“Kukdumaloq” va “Zevarda” konlaridagi gaz siquv kompressor stansiyalarida modernizatsiya ishlarini bajarish va SPCHlarni almashtirish hamda siquv kompressor stansiyalarini barqaror ishlashini taʼminlash maqsadida ishlab chiqaruvchilar bilan shartnomalar tuzish orqali 35 ta gaz turbinali dvigatellarni kapital taʼmiralsh ishlarini olib borish rejalashtirilgan.
“Shoʻrtan”, “Tegirmon” va “Arslon” konlarida gazni dastlabki tayyorlash qurilmalarini qurib ishga tushirish, shuningdek konlarda gaz siqilishini oldini olish, oʻtkazuvchanligini oshirish maqsadida 192 km har xil turdagi gaz quvurlari qurish rejalashtirilgan.
Yuqorida sanab oʻtilgan tadbirlarni bajarish uchun, bugungi kunda dunyoning ilgʻor kompaniyalar tomonidan ishlab chiqarilgan zamonaviy 30 ta burgʻilash va 37 ta kapital taʼmirlash stanoklari pudradchilar orqali jalb qilingan. Uglevodorod konlaridagi past bosimdagi qoldiq zahirani qazib olish olish maqsadida kichik kompressor stansiyalarni yetkazib kelish va ularni oʻrnatish boʻyicha ishlab chiqaruvchilar bilan jadal surʼatlarda muzokaralar olib borilmoqda.
Qazib chiqarish chora-tadbirlarni amalga oshirishda geologik-texnologik risklarni kamaytirish maqsadida 2023-yilda yangi ochiladigan barcha konlarning geologik modeli, 28 ta konning gidrodinamik modeli va 40 ta konning tarmoq modellari, 8 ta konning integral modellarini tuzish ishlari hamda 2020-2022-yillarda ishlab chiqilgan 19 ta konning geologik modeli, 65 ta konning gidrodinamik modeli va 40 ta tarmoq modellarini yangi burgʻilangan quduqlar maʼlumotlari asosida yangilash ishlari amalga oshiriladi.
Shuni taʼkidlash lozimki, soʻnggi yillarda Ustyurt mintaqasining yuqori istiqbolga ega boʻlgan 4000-7000 metr chuqurliklarda joylashgan quyi yura davri yotqiziqlari 3D seysmik-qidiruv materiallari yangi eXchroma texnologiyalarini tatbiq etgan holda qayta atribut tahlil qilinmoqda. Shu orqali “Sudochiy” botiqligining chuqur geologik tuzilishi, burgʻilashdan olingan barcha geologik-geofizik va boshqa maʼlumotlarni oʻrganish hamda hududning regional modeli asosida aniqlangan yangi mahsuldor qatlamlarni neftgazga istiqbolligi hamda uglevodorod resurslarini baholash ishlari “Schlumberger” xalqaro servis kompaniyasi bilan hamkorlikda olib borilmoqda.
Hozirgi kunda Dastur doirasida “Oʻzbekneftgaz” AJ tasarrufidagi barcha konlar, shu jumladan tajriba sanoat usulida ishlatilayotgan konlarning holati “Schlumberger” kompaniyasi bilan tahlil qilib borish orqali, samarasidan kelib chiqib, tavsiyalariga asosan oʻzgartirish kiritib borilmoqda.
Shu bilan birga bugungi kundagi eng dolbzor masalalardan biri hisoblangan energiya samaradorligini oshirish yoʻnalishida ham ishlar tashkil etilgan boʻlib, “Oʻzbekneftgaz” tasarrufidagi boshqarma va korxonalar kesimida 2023-yil uchun energiya resurslarni tejash maqsadida energiya tejovchi moslamalarni oʻrnatish (18 ta), elektr qurilmalari ish rejimlarini optimallashtirish (7 ta) va qayta tiklanuvchi elektr manbalarini oʻrnatish (31 ta) bilan bogʻliq jami 56 ta tashkiliy texnik tadbirlar ishlab chiqilgan.
Jumladan, muqobil energiya manbalarini joriy qilish boʻyicha turli quvvatlardagi jami quvvati 801 kVt boʻlgan 25 ta komplekt quyosh fotoelektr stansiyalari, turli sigʻimdagi jami sigʻimi 3800 litr boʻlgan 20 komplekt quyosh suv qizdirgichlari va 10,5 kVt boʻlgan 70 komplekt quyosh panelli koʻcha yoritish chiroqlari oʻrnatiladi.
Ushbu chora-tadbirlarni bajarish uchun “Oʻzbekneftgaz” AJ tomonidan barcha imkoniyatlardan keng foydalanilgan holda moliyaviy mablagʻlar bilan taʼminlash uchun barcha choralar koʻriladi.
“Oʻzbekneftgaz” AJ matbuot xizmati
Izoh (0)