Sirdaryoda ko‘pkari uchun olib kelingan bo‘ri tabiatga qo‘yib yuborildi
Sirdaryo viloyatida o‘tkaziladigan ko‘pkari uchun Zomin qo‘riqxonasidan bo‘ri olib kelinishi haqida tarqalgan xabar yuzasidan o‘rganish ishlari olib borildi.
Sirdaryo viloyati Ekologiya boshqarmasi hamda Ichki ishlar xodimlarining o‘rganishlarida videotasvirdagi fuqarolardan biri Xovos tumanining “Istiqlol” mahallasida yashovchi fuqaro Sh.R ekani aniqlandi.
O‘rganishlar davomida Sh.R ko‘pkariga sovrin uchun bo‘ri qo‘yishni maqsad qilgani, videotasvirdagi holat Zomin tumanida tasvirga olingani va bo‘ri ushbu tumanda yashovchi fuqaro E.A ning uyida saqlanayotganini bildirgan. Holat yuzasidan belgilangan tartibda hujjatlar rasmiylashtirilib, Jizzax viloyati Ekologiya va Ichki ishlar boshqarmalari xodimlariga tegishli ma’lumotlar taqdim qilindi.
Ushbu ma’lumotlarga asosan olib borilgan o‘rganishlar davomida “Turkman” mahallasida yashovchi K.Gʻ. ismli fuqaro o‘z xonadonida bo‘rini noqonuniy tarzda tutqunlikda saqlab kelayotganligi aniqlandi. Fuqaro harakati bilan “Hayvonot dunyosini muhofaza qilish va undan foydalanish to‘g‘risida”gi qonunining tegishli moddalari talablarini buzgan.
Shundan kelib chiqib, mazkur fuqaroga nisbatan Ma’muriy-javobgarlik to‘g‘risidagi kodeksning 90-moddasi (ov qilish va baliq ovlash qoidalarini, shuningdek hayvonot dunyosidan foydalanishning boshqa turlarini amalga oshirish qoidalarini buzish) 1-bandiga asosan BHMning 10 baravari, ya’ni 3 million so‘m miqdorida jarima belgilandi. Bo‘rining holati ko‘zdan kechirilganda, jonivor sog‘lom ekanligi ma’lum bo‘ldi. Shundan so‘ng bo‘ri tabiat bag‘riga qo‘yib yuborildi.
