O‘zbekistonda ichki ishlar ishlar organlari tizimini korrupsiyadan xoli sohaga aylantirishga qaratilgan vazifalar belgilandi.
2023-yil 20-yanvar kuni prezidentining “Ichki ishlar organlarini xalqchil professional tuzilmaga aylantirish va aholi bilan yanada yaqin hamkorlikda ishlashga yo‘naltirish bo‘yicha qo‘shimcha chora-tadbirlar to‘g‘risida”gi qarori qabul qilindi.
Qarorga asosan, ichki ishlar organlarida kadrlar bilan ishlash tizimini yanada takomillashtirish maqsadida:
- ichki ishlar organlarida xizmatga qabul qilish bo‘yicha nomzodlarni tanlashning adolatli, xolis va shaffof tizimini yaratib, o‘rnatilgan tartiblarni tubdan soddalashtirish va byurokratik to‘siqlarni bartaraf etishga qaratilgan kompleks chora-tadbirlarni belgilash;
- inson omilini istisno etish hamda korrupsiya holatlarining barvaqt oldini olish maqsadida ichki ishlar organlarida kadrlar bilan ishlash, xizmatni o‘tash qoidalariga rioya etilishini ta’minlash, shuningdek, shaxsiy tarkib va ularning oila a’zolarini ijtimoiy himoya qilish tizimini zamon talablariga mos ravishda to‘liq raqamlashtirish kabi vazifalar ushbu sohadagi ustuvor yo‘nalishlar etib belgilandi.
Qaror bilan Ichki ishlar organlari xodimlarining kasbiy madaniyat va xizmat intizomi kodeksi tasdiqlandi.
Ushbu kodeksga ichki ishlar organlari tizimida korrupsiya, tamagirlik, manfaatlar to‘qnashuvini oldini olish, faoliyatning ochiqligi va shaffofligini ta’minlashga qaratilgan muhim qoidalar kiritilgan. Ichki ishlar organlarining har bir xodimi kodeksda belgilangan qoida va talablarni bilishi, ularga qat’iy va so‘zsiz amal qilishi majburiy hisoblanadi. Kodeks xodim faoliyati samaradorligi va intizomini baholashning asosiy mezoni bo‘ladi.
Kodeksda ichki ishlar organlari xodimlariga bir qator taqiqlar qo‘yilmoqda. Xususan xodimlarga:
- xizmat majburiyatlarini bajarish va xizmat vaqtida yohud xizmat kiyimida spirtli ichimliklar iste‘mol qilish;
- mansab vakolatlarini siyosiy partiyalar, jamoat birlashmalari va ularning organlari manfaatlari yo‘lida amalga oshirish;
- tadbirkorlik faoliyati subyekti sifatida yoki uning nomidan bu sohada qonunchilik hujjatlariga muvofiq amalga oshiriladigan, o‘zi tavakkal qilib va mulkiy javobgarligi ostida daromad olishga qaratilgan faoliyat bilan shugʻullanish;
- tadbirkorlik faoliyati subyektlarini tashkil etishga, ularning muassisi boʻlishga, tadbirkorlik faoliyati subyektida tashkiliy-boshqaruv, ma’muriy-xo‘jalik vazifalarini bajarish (bundan AJlarining erkin muomalada boʻlgan aksiyalariga egalik qilish mustasno);
- xizmat vakolatlarini jismoniy va yuridik shaxslar manfaatlarini ko‘zlab bajarish yoki bajarmaslik evaziga ulardan har qanday sovg‘alar hamda har qanday ko‘rinishdagi moddiy boyliklarni olish yohud ularning xizmatlaridan foydalanish;
- xizmat faoliyati bilan bogʻliq maʼlumotlarni oila aʼzolari, tanish-bilishlari yoki xizmatga aloqador bo‘lmagan boshqa shaxslar bilan muhokama qilish taqiqlanadi.
Bundan tashqari, xodimlar fuqarolarga nisbatan qo‘pollik qilmasligi, ularning sha’ni va qadr-qimmatini kamsitish, asossiz ruhiy va jismoniy ta’sir o‘tkazish holatlariga yo‘l qo‘ymasligi lozim.
Ular kodeksdagi qoidalar va talablarga amal qilmasa yoki ularni qo‘pol ravishda buzsa, ichki ishlar organlaridan xizmatdan bo‘shatishgacha bo‘lgan intizomiy jazoga tortilishi belgilab qo‘yilgan.
Mavzuga doir: O‘zbekistonda ichki ishlar organlari ustidan jamoatchilik nazorati o‘rnatiladi
Izoh (0)