O‘zbekistondan Afg‘onistonga elektr energiyasi yetkazib berish tiklanishi rejalashtirilmoqda

Energetika vazirligi O‘zbekistondan Afg‘onistonga elektr energiyasini yetkazib berish qayta tiklanishi rejalashtirilayotganini e’lon qildi.

2023-yilning 14-yanvaridan O‘zbekistonda havo haroratining keskin pasayishi oqibatida issiqlik elektr stansiyalarida yoqilg‘i ta’minotida vujudga kelgan muammolar, ya’ni yog‘ilg‘i tanqisligi va turli nosozliklar paydo bo‘lgani, shuningdek, respublika iste’molchilarini barqaror elektr energiyasi bilan ta’minlash maqsadida Afg‘onistonga elektr energiyasini yetkazib berish vaqtinchalik to‘xtatilgan edi.

Ushbu fors-major holati haqida Afg‘oniston energetika tashkiloti ogohlantirilgan. Endilikda 25-yanvardan boshlab ushbu mamalakatga elektr energiyasini yetkazib berish qayta tiklanishi rejalashtirilmoqda.

“O‘zbekistonda ishlab chiqarilgan va ichki iste’molga mo‘ljallangan elektr energiyasi eksportga yo‘naltirmaydi. Hukumatlararo kelishuvga muvofiq amalga oshiriladigan elektr energiyasi import amaliyotining bir qismi Afg‘onistonga (imzolangan shartnomalarga muvofiq) eksport qilinadi”, — deya tushuntirish bergan Energetika vazirligi.

Afg‘onistonning Kobul shahri va viloyatlarida elektr energiyasi taqchilligi davom etayotgani sababli “Tolibon” O‘zbekistonga murojaat qilib, O‘zbekistondan shartnoma asosida elektr energiyasi eksport qilishni so‘ragandi. “Tolibon” tashqi ishlar vaziri vazifasini bajaruvchi Amirxon Mutaqqiy Kobuldagi Afg‘oniston qishloq xo‘jaligini rivojlantirish jamg‘armasi ochilishida O‘zbekiston hukumati Afg‘oniston elektr energiyasi kompaniyasi bilan imzolangan shartnomaga muvofiq o‘z va’dalarini bajarishiga umid bildirgandi.