Argentina Rossiyaning Ukrainadagi harbiy harakatlarini qo‘llab-quvvatlamaydi, aksincha muzokaralar jarayonini qayta boshlash tarafdori, lekin Moskva bilan aloqalarni ham rad etmaydi. Bu haqda Argentina prezidenti Alberto Fernandes Braziliya nashriga bergan intervyusida aytdi, deb yozmoqda “RBK”.
“Oxirgi safar Rossiya prezidenti Vladimir Putin Argentinani jahon chempionatidagi g‘alaba bilan tabriklash uchun menga qo‘ng‘iroq qilgandi va men unga bu masalani (Ukraina bilan muzokaralar — tahr.) hal qilish uchun muzokaralar stoliga o‘tirish kerakligini yana bir bor ta’kidladim”, — dedi Fernandes.
Putin Fernandesga qo‘ng‘iroq qilib, Argentina terma jamoasini 18-dekabr kuni jahon chempionatidagi g‘alabasi bilan tabriklagan.
Argentina urush boshlanganidan keyin Rossiyaga qarshi sanksiyalar kiritmadi. Aprel oyida Amerika davlatlari tashkiloti kengashi (ADTK) harbiy harakatlar boshlangani sababli Rossiyani kengashda kuzatuvchi maqomidan mahrum qilgan, biroq Buenos-Ayres ovoz berishda betaraf qolgan edi.
Bundan tashqari Argentina Braziliya va Meksika bilan birga ADTKning yillik yig‘ilishida Rossiyaning Ukrainadagi harbiy amaliyotini qoralovchi rezolyutsiyani qo‘llab-quvvatlamagan.
Izoh (0)