Rossiyaning Nijniy Novgoroddagi munitsipal bolalar bog‘chasi qurilishida ishlagan o‘zbekistonlik ikki ishchi qullikdan qochishga muvaffaq bo‘ldi. Bu haqda “Alternativ” qullikka qarshi harakatning Telegram’dagi kanalida ma’lum qilindi.

Harakatga ko‘ra, o‘zbekistonlik ikki erkak, R.M va X.X, 2022-yilda bir do‘stining taklifi bilan Rossiyaga ishlash uchun kelgan. Ularga oyiga 800 dollar evaziga bolalar bog‘chasi qurilishida ishlash taklif qilingan. Keyinchalik ularning telefoni tortib olgan. Oradan bir necha oy o‘tib, ishlash uchun ruxsatnomalarini yangilash chog‘ida R.M va X.X pasportlaridan mahrum bo‘lgan, ularga pul to‘lash ham to‘xtatilgan.

Jabrlanuvchilar faoliyatini davom ettirishi uchun muntazam ravishda kaltaklangan, ish beruvchilar huquqni muhofaza qilish organlariga aloqadorliklarini aytib, ularga tahdid qilgan.

Mash Telegram’kanalida yozilishicha, yanvar oyida yigitlar buyum va kiyimsiz qochishga qaror qilgan. Keyinroq “Alternativa” ko‘ngillilari ularni Moskvadagi podyezdlardan birida muzlab qolgan holda topgan. Hozirda jabrlanuvchilar uchun vaqtinchalik hujjatlar rasmiylashtirilgan, yaqin kunlarda ular uylariga qaytishi mumkin.

Bundan tashqari, yigitlar Qozonda mehnat muhojirlarini turli hududlarga tarqatadigan markaz borligi, ularda ham shunday voqealar kuzatilishini aytgan.

Mavzuga doir: Meksikada garovda ushlangan yetti nafar o‘zbekistonlik qutqarildi (foto)